ژئه‌گه‌رێ بوردمان و شه‌ر و ئالوزیێن دناڤبه‌را پاركا كرێكارێن كوردستان و سوپایێ توركیا، ژ كوما 92 گوندێن سنورێ ناحیا شێلادزێ، ره‌زڤان و وه‌لاتیێن تنێ حه‌فت گوندان دشێن بچنه سماقێن خوه و ئه‌و ژی ب گوره‌ى رێنما و ب ترسڤه.
عه‌بدوللا سه‌دیق، هه‌لبژێرێ ئێك ژ گوندێن ناوچه‌دارییا شێلادزێ بۆ "وشه" گۆت، ب ئه‌گه‌رێ بلندبوونا پله‌یێن گه‌رمایێ و هشكه‌سالیێ ئه‌ڤ ساله وه‌رزێ چنینا سماقێ زوتر ژ سالێن بورى ده‌ستپێكر، مه خه‌لكێ گوندى ئاگه‌هداركرینه كو دده‌ما 15 رۆژان داس ماقێن خوه ب چنن داكو نه‌كه‌ڤنه بن مه‌ترسیێن بۆردمانێن باله‌فرێن توركیا و گیانێ وان پاراستى بیت.
زێده‌تر گۆت، هه‌ر چه‌نده پێشتر و هه‌تا نوكه ل گوندێ مه بۆردمان نه‌هاتیه‌كرن، به‌لێ گوندێن ده‌ردورا مه دهێته‌كرن، له‌وا پێدڤى یه ب زوترین ده‌م وه‌لاتى سماقێن خوه ب چنن، ل گوندێ مه پترى 200 ره‌زێن سماقێ هه‌نه و تێكرا هه‌ر ئێك ژ وان ره‌زا نێزیكێ دوو ته‌نێن سماقێ پێڤه دهێن، ئه‌ڤ یه‌ك ژی زۆر باشه ژبه‌ركو ژین و ژیار و داهاتێ پشكه‌ك ژ وه‌لاتیان ل سه‌ر فروتنا به‌رهه‌مێن چیایى یه ژ وانان سماق.
مێهڤان رێكانى، وه‌لاتیه‌كێ ناوچه‌دارییا شێلادزێ یه ئه‌و دبێژیت، ده‌ڤه‌را نێروه‌ورێكان كو دبنه گونده‌وارێن سنورێ ناوچه‌دارییا شێلادزێ دبن بوردمانێن سه‌خت یێن شه‌ر و ئالوزیێن دناڤبه‌را توركیا و په‌كه‌كێ دایه و خه‌لك ب چوو ئاواى نه‌شێن قه‌ستا وان گوندان بكه‌ن، مخابن هه‌موو ره‌ز و بیستان و به‌رهه‌مێن چیایى یێن وان گوندان پوچ دبیت و كه‌س نه‌شێن كوم بكه‌ت و بفروشیت.
زێده‌تر گۆت، پێشتر چه‌ند كه‌سان بزاڤ كریه كو قه‌ستا وان گوندان بكه‌ن و به‌رهه‌مێ خوه كوم بكه‌ن، به‌لێ بوینه ئارمانجا باله‌فرێن توركیا و هاتینه شه‌هید و برینداركرن، له‌وا د نوكه دا چوو كه‌س نه‌شێت بچنه وان گوندان.
ب گوره‌ى داتایێن ئالیێن شوله‌ژێ سنورێ ناوچه‌دارییا شێلادزێ 92 گوند هه‌نه، ژ هه‌موو وان گوندان ژی ب تنێ حه‌فت گوند ئاڤه‌دانن، به‌لێ خه‌لكێ وان هه‌ر جه‌فت گوندان ژى ب گوره‌ى رێنما دشێن بچنه گوندێن خوه و مفاى ژ ده‌رامه‌ت و به‌رهه‌مێن چیایى وه‌ربگرن.
ئامێدیێ، نه‌وزاد هلۆرى: