ئەمڕۆ ژمارەیەك لایەنی سیاسیی هەرێمی كوردستان لەگەڵ یەكێتی نیشتمانیی كوردستان كۆ بوونەوە، یەكێتی ئاماژە دەكات كۆبوونەوەكە بۆ ئەوەیە حوكمڕانی و دەسەڵاتی ئێستە بە دڵی ئەوان نییە و جیاوازی لە نێوان سلێمانی و پارێزگاكانی تر دەكرێت، كەچی هەمووان، بە هێزە سیاسییەكانیش، دەزانن كە یەكێتی خۆی هۆكاری ئەو كێشانەیە كە لە سلێمانی روو دەدا و خۆی تیایدا دەسەڵاتدارە.
لایەنەكانی تری دەرەوەی كۆبوونەوەی ئەمڕۆ لەبارەی ناوەڕۆكی كۆبوونەوەكە دەڵێن، دەسەڵاتی ئێستە زۆر لە خزمەتی هاووڵاتییاندا بووە، ئەوان كە دەزانن شتەكە بە دڵی خۆیان نییە، بۆیە هاتوون دژایەتی دەكەن و دەیانەوێ بەهەر جۆرێك بێت بە دڵی ئەوان بێت، بەڵام ئەمە حكوومەتە و كارێك دەكا بە دڵی خەڵك بێت نەك بە دڵی حزبەكان.
محەمەد سەعدەدین، سەرۆكی فراكسیۆنی پارتی گەشەپێدانی توركمانی لە پەرلەمانی كوردستان بە "وشە"ی راگەیاند، ئەو سیستمە كارگێڕی و سیاسییەی هەرێم لە قۆناغێكی زۆر قورسدا دەستبەكار بوو، ئەم كابینەیە كە پێك هات لە بەغدا پشێوییەكی سیاسی هەبوو، عێراق بەرەو هەڵبژاردن دەرۆیشت و دۆخێكی خراپ عێراقی گرتەوە، دواتر لە ساڵی 2020 نەخۆشی و تەنگژەی دارایی بەسەردا هات، ئەمە گرفتی لەبەردەم حكوومەت و كارنامەكەی دروست كرد، بەڵام حكوومەت لە خزمەتكردنی خەڵك درێغی نەكردووە.
روونی كردەوە، لایەنەكان دژایەتی زۆری حكوومەت دەكەن، لەوكاتەی خزمەتكردنی خەڵك پێوەری لەپێشینەی كارەكانی حكوومەتە، بۆیە ئەوەی كراوە، سەرەڕای ئەوەی بەغدا ئامادە نییە شایستە داراییەكانی هەرێم بنێرێت، بەڵام حكوومەت لە كەرتەكانی كارەبا و تەندروستی و پەروەردە و خزمەتگوزاریدا پڕۆژەی زۆر باش كراوە و بەرەوپێشچوون هەیە، ئەوە لەوكاتەی پێكهێنەرانی ئەم كابینەیە هاوكار نین و بەردەوام گرفت دروست دەكەن، بەڵام پێویستە ئەو جیاوازی و ناكۆكی سیاسییە نەمێنێ و گرفت بۆ حكوومەت دروست نەكرێت، تا بە باشترین شێوە خزمەت بكات، حكوومەتیش كاری خزمەتكردنی هاووڵاتییە نەك رازیكردنی حزبەكان.
لای خۆیەوە جیهاد حەسەن، ئەندامی پەرلەمانی كوردستان لە فراكسیۆنی پارتی بە "وشە"ی گوت، هەر كاتێك حكوومەت سەركەوتوو بێت ئەو لایەنانە بەدڵیان نییە، لە هەموو دنیا باس لە رۆڵ و گرنگی حكوومەتی هەرێم دەكرێت، عێراق دەوڵەتێكی پڕ ئابوورییە، بەڵام خەڵكەكەی خۆزگە بە هەرێم دەخوازن كە ناوچەیەكی ئارام و سەقامگیرە، بۆیە خەڵكی كوردستان بە گرنگییەوە دەڕواننە حكوومەتی خۆیان، ئەو لایەنانەش ماوەیان بەسەر چووە و لای خەڵك گرنگ نەماون، بۆیە پەنا دەبنە بەر ئەوەی دژی حكوومەت بوەستنەوە.
ئاماژەی كرد، ئەوان مێژوویان لە فرۆشتنی كوردستان و دروستكردنی بشێوی هەیە، بەڵام سەركەوتوو نەبوون، بۆیە ئەو لایەنانە هیچیان بۆ خەڵك پێ نییە و خەڵكیش لێیان بێزار بووە، ئێستە بۆ خۆشگوزەرانی كوردستان لەگەڵ وڵاتان ركابەری دەكات، خەڵكیش وشیارە و دەزانێ ئەوانە چیان دەوێت، دەیانەوێ شتێك بكرێت كە بەدڵی ئەوان بێت، بەڵام كوردستان هەنگاوی گەورەی ناوە و لە هەموو بوارێكدا دۆخەكە بە دڵی خەڵكە.
پێوەست بەو بابەتە بانیان هیوا، چاودێری سیاسی لە سلێمانی بۆ "وشە" ئاماژەی كرد، ئەو لایەنانە هیچیان بۆ خەڵك و میلەت و جەماوەی خۆیان پێ نییە، هاتوون دەیانەوێ دژایەتی حكوومەت و دەسەڵاتی ئێستە بكەن، ئەوانە چونكە خۆیان توانای كاركردنیان نەماوە، بۆیە دەیانەوێ گرفت بۆ حكوومەت دروست بكەن، دووپاتی كردەوە كە حكوومەتی هەرێم بەبێ گوێدانە رەنگ و دەنگ و بیركردنەوەكان خزمەت بە هەموو شوێن و جێیەك دەكات، سلێمانی تاكە پارێزگایە كە بە بەردەوام دژایەتی حكوومەتی تێدا دەكرێت، بەردەوامیش داواكاری هەیە بۆ خزمەتگوزاری و پڕۆژە.
وشە/ تایبەت