بو دووڤ چون وبجهئینانا پرۆژێن خزمەتگوزاری، ئەڤرۆ ب ئامادەبوونا پارێزگارێ دهۆکێ، بەرێ بنیاتی بو هەشت پرۆژێن خزمەتگۆزاری ل سنورێ دەڤەرداریا ئاکرێ هاتنە دانان.
ل دور پرۆژان، د. عەلی تەتەر، پارێزگارێ دهۆکێ گوت، ئەو پرۆژێن ئەڤرو مە بەرێ بنیاتی بو دانای و مە ڤەکرین بهایێ وان پترە ژ هەشت ملیار دیناران و هەموو سەکتەران ب خوڤە دگریت، ئەو پرۆژە هەموو یێن ساڵا 2022 بوون و ل دووڤ راسپاردێن مەسرور بارزانی سەروکێ حکومەتا هەرێما کوردستانێ بو ساڵا 2023 ژی مە بەرنامەکێ بەرفره هەیە کو کومەکا پرۆژێن خزمەتگوزاری یێن جورا وجور ل هەموو دەڤەرداری وناوچەداری وکومەلگەه و گوندێن پارێزگەهێ ئەنجام دەین.
پرۆژێن نوو پێکدهێت ژ دانانا بەرێ بنیاتی بو ئاڤاکرنا دوو قوتابخانا ئێک یا 18پولی وئێکا 12 پولی ل سەنتەرێ ناوچەداریا گردەسین ب گوژمێ دوو ملیار و 795 ملیون دینارا ، پاش هەوەکا دار چاندنێ ل سەنتەرێ ناوچەداریێ هاتە ئەنجامدان، دانانا بەرێ بنیاتی بو ئاڤاکرنا قوتابخانەکا 12 پولی ل تاخێ گولان ل سەنتەرێ ئاکرێ ب گوژمێ ملیارەک و 239 ملیون دیناران، دانانا بەرێ بنیاتی بو چێکرنا بوندێن بجێل و شەرمن ب گوژمێ 855 ملیون دیناران.
دیسان دانانا بەرێ بنیاتی بو چێکرنا رێکێت نافخویی ل سەنتەرێ ناوچەداریا بجێل ب گوژمێ 318 ملیون دیناران، دانانا بەرێ بنیاتی بو چێکرنا بنگەهەکێ ساخلەمیێ یێ پێشکەفتی ژجورێ A ل گەل هولا زارۆکبۆنێ ل سەنتەرێ ناوچەداریا دینارتە ب گوژمێ ملیارەک و 28 ملیون دیناران، دانانا بەرێ بنیاتی بو چێکرنا رێکێت نافخویی ل سەنتەرێ دینارتە ب گوژمێ 327 ملیون دیناران، ڤەکرنا رێکا گوندێ گویسکێ ب درێژیا 2،7کم ل گەل سەخبێرکرنا هەردوو پرێن ئاسنی ل گەلی زەنتە ل ئاکرێ بگوژمێ 336 ملیون دیناران، ل دوماهیێ پارێزگارێ دهۆکێ سەرا نەخوشخانا گولان ل ئاکرێ دا.