هەڤژینی پروسەیەکا ئالوزە و تێگەهشتنا وێ دەم دڤێت، یان هەڤژینی پروژەیەکێ ستراتیجیە و دڤێت بنیاتەکێ بهێز بۆ بهێتە دانان، دیسان دهێتە گوتن کو هەڤژینی مینا شورەشەکێ یە، تا سەردکەڤیت دڤێت چەندین قوربانیان بدەت، لەوا دێ بینی گەرماتی و ساربوون دکەڤیتە د پروسا هەڤژینیێ دا.
دێژین زێباری، ژنەکا دەڤەرا شێلادزێ یە و چوار سالە هەڤژینی پێکئینایی بو "وشە" گۆت، بێگومان هەڤژینی ئێکە ژ کارێن هەری گرنگ و دڤێت هەموو مروڤ ب گورەی تەمەن و دەم تاقی بکەن، هەردەما هەڤژینی هاتە پێکئینان چەندین گورانکاریێن نوو د ژیانا مروڤی دا دروست دکەت، بەلێ هندەک جاران ئەو گورانکاری ب دلێ مروڤی نابن و دڤێت قبول بکەت، ئەوێن قبول نەکەن ل وی دەمی ساربوون دناڤبەرا وان دا دروست دبیت.
زێدەتر گوت، ب هزرا من تاکە رێیا چارەسەریێ ئەوە کو هەڤژین دڤێت ل تەمەنەکێ گونجای بن و ئاستێ رەوشەنبیریێ وان ل هەڤدوو نێزیک بیت، گرنگی ب بابەتێن رەوشتی بدەن و بەردەوام خوە پێبگەهینن داکو نەکەڤنە چوو شاشیان، دیسان دڤێت زور گرنگی ب لایەنێ رووحی بدەن ب تایبەتی دلینی.
بەختیار عەبدوللا، زەلامەکە و ئەوی ژی ئەڤە هەشت سالە هەڤژینی پێکئینایی، ئەو دبێژیت، هەڤژینی قوناغەکا نوویە د ژیانا مروڤی دا وەکو چەوا دایباب و خوشک وبرا قوناغێن گرنگن دژیانا مروڤی دا، دڤێت مروڤ تەمەنێ خوە ب خوشی و نەخوشی پێکڤە ببورینیت داکو بشێت بەردەوام بیت و چوو ئاریشە و کێشە وساربوون دناڤبەرا وان دا دروست نەبن.
یاسین محەمەد، ماموستا و شارەزایەکێ جڤاکی ل سەر بابەتی گوت، بێگومان ب درێژاهیا دەمی ساروون دناڤبەرا هەڤژینان دروست دبن و ئەفە تشتەکێ نورمالە، بەلێ یا نە نورمال ئەوە کو ساربوون یا بەردوام بیت و بزاڤا چارەسەرکرنا وێ نەهێتەکرن.
زێدەتر گوت، ئەم دشێن بێژین کو هەڤژینی دڤێت وەکو شورشەکا پری قوربانی بیت تا دگەهیتە ئارمانج کو ئەو ژی بەختەوەرییە، دیسان ئەم دشێن بێژین کو هەڤژینی وەکو پروژەیەکێ ستراتیجی و مەزنە، چەندە بنیاتەکێ بهێز بو پرۆژەی بهێتە دانان، دێ پروژە زێدەتر خوە گریت و ب هێز مینیت، هوسا دڤێت هەڤژینی ژی ل سەر بنەمایەکێ بهێز و زانستی بهێتە ئاڤاکرن داکو چوو شاشیێن وەسا دناڤبەرا وان دا دروست نەبن بگەهیتە ساربوونا پەیوەندیان.
ناڤبری ل بارا چارەسەریا بابەتی گوت، چارەسەریا بابەتی ب چوو ئاوایی ناهێتەکرن ژبەرکو نەخۆشیە ،بەلێ مروڤ دشێت هندەک خالا دیار بکەت کو ببیتە ئەگەر جارەکا دی پەیوەندێن وان گەرم بن، هەڤژین دڤێت رەخنان ل هەڤدوو نەگرن، تشتێ بوری نەئینن بیرا هەڤدوو، دیسان گرنگی ب مروڤایەتی بدەن، رێزەکا زور دناڤبەرا وان دا هەبیت، بەردوام ئەڤین و خوشەویستیا خوە نوو بکەن، هەردیسان گرنگی ب لایەنێ ئیمانی بدەن و بەردەوام ژی ئاخفتن و گوتنێن جوان بەرامبەری هەڤدوو بکاربینن ب تایبەتی گوتنێن گرێدای خوشەویستی.