نێزێکێ حەفتیەکێ یە دەست ب ئەلترونیکرنا پلێتا ئاهێن خوارنێ ل دهوکێ هاتیەکرن وەکو ئێکەم پارێزگەهـ ل عیراق و کوردستانێ، رێڤەبەرییا ئاهێن خوارنێ ژی دیارکر کو دڤێت ب زوترین دەم وەلاتی پلێتا نوو وەربگرن داکو بێ بەهرنەبن.
قەیس وەیسی، بەرپرسێ راگەهاندنا ئاهێن خوارنێ ل پارێزگەها دهۆکێ دیارکر کو پارێزگەها دهوکێ وەک ئێکەم پارێزگەهـ دەست ب دابەشکرنا پلێتا ئاهێن خوارنێ یا ئەلیکترونی کریە و گوت، پلێتا ئاهێن خوارنێ یا ئەلیکترونی ل سەر شینکارێن دابەشکرنا ئاهێن خوارنێ هاتینە دابەشکرن و پێدڤی یە وەلاتی ب زوترین دەم بچن وەربگرن، پاشان سەرەدانا بنگەهێن کاراکرنێ بکەن، د نوکە دا نێزیکێ 25 هزار سەرۆک خێزانان پلێتێن خوە کاراکرینە.
زێدەتر گوت، هەر ژ روژا دەستپێکرنا پروسا کاراکرنا پلێتا ئاهێن خوارن یا ئەلکترونی حەتا ئەڤرۆ ل بنگەهێن سەنتەرێ باژێرێ دهۆکێ و سێمێلێ و کومەلگەها تەناهی 24 هزار و 932 سەروک خێزانا سەرەدانا بنگەهێن مە کریە و پروسە ژی یا بەردەوامە، ئانکو هەتا نوکە سێ هزار و 925 خێزانان مافێ خوە یێن ئاهێن خوارنێ پاراستیە، داخوازێ ژ هەموو ولاتیان دکەین ب زوترین دەم سەرەدانا بنگەهێن کاراکرنا پلێتا ئاهێن خوارنێ بکەن دا کو بەهرا خوە ژ ئاهێن خوارنێ یێ هەیڤانە پارێزن، "بەروڤاژی ئەگەر هەیە بێ بەهر بیت ژ ئاهێن خوارنێ".
ل سنورێ پارێزگەها دهوکێ هەشت قەزا و 24 ناحی و 914 گوند و کومەلگەهـ هەنە، ل پرانیا شینکاران پلێتا نوو هاتیە دابەشکرن و وەلاتی دچن وەردگرن، پارێزگەها دهوک وەکو ئێکەم پارێزگەها هەرێما کوردستانێ پلێتا ئاهێن خوارنێ کریە ئەلیکترونی.