"هەفتەی داهاتوو بارانێكی باش دەبارێت و پەڵە دەدات"

:: PM:06:29:10/11/2023 ‌
دوای ئەوەی هەفتەی رابردوو شەپۆلێكی بەخووڕی یەك رۆژەی باران تەواوی ناوچەكانی هەرێمی گرتەوە، شارەزایەكی كەشناسی پێشبینی دەكات لە چەند رۆژی داهاتوو كەشی تەڕ و باراناوی دووبارە دەست پێ دەكاتەوە و مژدەی پەڵەدانیش بە جووتیاران دەدات. 

ئەمڕۆ هەینی 11ی نۆڤێمبەری 2023، شاڵاو هیدایەت پێشبینیكاری پێشكەوتووی كەشناسی لە پێگەی كۆمەڵایەتی خۆی بڵاوی كردووەتەوە، داوا لەو جووتیارانە دەكەم كە تۆوەكانیان نەچاندووە،  ئەم چەند رۆژەی داهاتوو تۆوەكانیان داچێنن چونكە ناوەڕاستی مانگ بەولاوە كەشی تەڕ و زۆر باش دەست پێ دەكات. 

ئاگاداركردنەوەی شاڵاو هیدایەت بۆ جووتیاران لە سۆنگەی ئەوەوە دێت كە بەهۆی ئەوەی شەپۆلەكانی باران یەك بەدوای یەك و لەیەكتر نزیكن مەوداكانیان، جووتیاران بواری داچاندنیان نەبێت بەهۆی بارانەوە و روونی كردووەتەوە، ئەستەمە كەشێكی باش بۆ داچاندن دوای ناوەڕاستی ئەم مانگە هەبێت بۆ جووتیار و شەپۆلەكان مەودایان لێك نزیك و كورتە و بەدوای یەكەوەن. 

شەپۆلە یەك بەدوای یەكەكانی باران بەپێی پێشبینییەكانی شاڵاو هیدایەت بەهۆی گۆڕانی سیستمی كەشوهەوای سەر ئەوروپا و گەڕانەوەی سیستمێكی تەڕ و دۆخێكی پڕ بارانە بۆ سەر ناوچەكانی هەرێمی كوردستان. 

لەبارەی رێژەی باران و شەپۆلەكانەوە " شاڵاو هیدایەت" نووسیوویەتی " پێدەچێ زۆربەی شەپۆلەكان بەهێز بن و لافاوی زۆریش لە ئارادایە و ئەگەریش زۆرە یەكەم شەپۆلی بەهێزی هەفتەی داهاتوو پەڵەی سەرتاسەری بدات".

بارانی په‌ڵه‌ بریتییه‌ له‌ بڕێك بارانی باش كه‌ بڕه‌كه‌ی له‌نێوان 20 تا 40 ملیمه‌ و مه‌رجه‌ بارانه‌كه‌ دابه‌ش بێت به‌سه‌ر كۆمه‌ڵێك سه‌عاتی زۆر، لایه‌نی كه‌م له‌ 12 سه‌عات كه‌متر نه‌بێت بۆ ئه‌وه‌ی تۆوی ڕووه‌كه‌ جۆربه‌جۆره‌كان سوودی لێوه‌رگرن و پێی بڕوێن كه‌ له‌ماوه‌یه‌كی كه‌مدا ئه‌و بڕه‌ بارانه‌ باری به‌ بارانی په‌ڵه‌ دانانرێت، چونكه‌ زۆربه‌ی بارانه‌كه‌ به‌سه‌ر خاكدا ده‌ڕوات و تۆوی ڕووه‌كه‌ جۆربه‌جۆره‌كان سوودی لێ وه‌رناگرن.


وشە - پۆڵا مەحموود