لە شەڕی حەماس و ئیسرائیلدا، كە لە رووی توانای سەربازیدا شەڕێكی ناهاوتایە، چەكی سەرەكیی حەماس جگە لە مووشەكەكانی، تونێلەكانیەتی، خۆی تیایان حەشار دەدات و وەك ناوەندی كۆنترۆڵ و نەخشەدانان و جێبەجێكردن و جبەخانە و حەشارگە و گواستنەوەی چەك و شەڕوان بەكاریان دێنێت، بە شێوەیەك ئەو تونێلانە ئێستەش سەرئێشەن بۆ سوپای ئیسرائیل لە تۆڵەی ئەوەی دەستی بە حەماس ناگات، زیاتر لە 12 هەزار هاووڵاتی كوشتووە و نیوەی شارەكەی وێران كردووە.
لە راپۆرتێكی رۆژنامەی
"وۆڵ ستریت جۆرناڵ"ی ئەمەریكی ئاماژە دەكات كە سوپای ئیسرائیل خەریكە شەڕەكەی دەباتە ژێر زەوی غەزە، ئەوەش لە رێگەی بەكارهێنانی رۆبۆت و تەقەمەنی شلەوە، روونی كردەوە، سوپای ئیسرائیل بەشی زۆری باكوری غەزەی كۆنترۆڵ كردووە، بە تایبەتی سەر زەوییەكەی، بەڵام هێشتا ژێر زەوییەكەی بە دەستی حەماسەوەیە، كەچی خەریكە شەڕەكە دەچێتە قۆناغێكی نوێ، كاتێك سوپای ئیسرائیل شەڕەكە دەباتە ناو تونێلە سەرسوڕهێنەرەكانی حەماس لە غەزە.
راپۆرتەكە ئاماژە دەكات كە شەڕی ئیسرائیل و تونێلەكانی حەماس سەرەتای شەڕێكی 20 ساڵەیە، لەو ماوەیەدا شەڕوانانی حەماس خەریكی فرەوانكردن و تۆكمەكردنی تونێڵەكان بوون، تا كردوویانە بە تۆڕێكی سەرلێشێواندنی فرەوان، لەوكاتەی ئیسرائل خەریكی مەشقكردن بوو لەبارەی چۆنیەتی بەڕێوەبردنی شەڕ لە ناویان، كاتێك یەكەی تایبەتی سەربازی و چەكی پێشكەوتووی بۆ لەناوبردنی ئەو تونیڵانە دابین كردووە.
راپۆرتەكە لە ئەفسەرێكی ئیسرائیلی دەگوازێتەوە كە سەرپەرشتیی شەڕی تونێلەكانی باكوری غەزە دەكات، ئەو دەڵێت، ئیسرائیل پەنای بردووەتە بەر بەكارهێنانی ئامێر و ئامرازی نوێ وەك رۆبۆتەكانی كامێرایان هەڵگرتووە بۆ وێنەگرتنی نەخشەی تونێلەكان و بارەبەرەی كۆنتێنەری پڕ لە تەقەمەنی شل، كە بە سۆندە و بۆری دەخرێنە ناو تونێلەكانەوە.
هەر بە پێی راپۆرتەكە ئیسرائیل رۆژانە زانیاریی ورد لەسەر ئەو تونێلانە كۆ دەكاتەوە، تونێلی نوێی بۆ ئاشكرا دەبێت و لێكۆڵینەوە لەگەڵ چەكدارە گیراوەكانی حەماس دەكات لەبارەیانەوە، هەمووشی بۆ پێشاندانی وێنەیەكی تەواو لەسەر ئەو تونێلانە بۆ سوپاكەی، بەڵام هەر بەپێی سوپای ئیسرائیل بۆ لەناوبردنی چەند سەت مەترسێك لەو تونێلانە، پێویست بە چەندان تۆن تەقەمەنی شل دەكات، بۆیە سوپای ئیسرائیل خەریكی پەرەپێدانی رێگەی ترە بۆ لەناوبردنیان.