كەشناسێكی هەرێمی كوردستان دەڵێت، تاوەبارانی ماوەكورت و هەورەبرووسكە كۆتایی نەهاتووە و بارانبارین دووبارە دەگەڕێتەوە بۆ ناوچە جیاوازەكانی هەرێمی كوردستان.
ئەمڕۆ سێشەم چواری حوزەیران، هەڤاڵ گڵۆزەیی شارەزای كەشناسی بە "وشە"ـی راگەیاند، بەگوێرەی پێشبینییەكانی دەزگای كەشناسیی ئەوروپی و ئەمەریكی و كەندی لە سەرەتای هەفتەی داهاتوو بە دیاریكراوی لە ڕۆژی شەموو كەشێكی ناسەقامگیر ڕوو لە ناوچە شاخاوییەكانی هەرێمی كوردستان دەكات.
زیاتر گوتی، شەپۆلێكی تاوەبارانی ماوەكورتی مامناوەند، لەگەڵ هەورەبرووسكە ئەو ناوچانە دەگرێتەوە و بۆ ماوەی چەند ڕۆژێك بە پچڕپچڕی بەردەوام دەبێت.
باسی لەوەشكرد، لە ناوەڕاستی هەفتە كاریگەریی شەپۆلەكە زیاتر دەبێ، ئەگەری هەیە فراوانتر بێت، هەروەها بارانبارین و هەورەبرووسكە تەواو سەنتەری شارەكانی هەرێمی كوردستان و بەشێك لە ناوچەكانی ناوەڕاست و باشووری عێراقیش بگرێتەوە.
هاتنی ئەو شەپۆلی بارانبارینە لە كاتێكە ئەمساڵ هەرێمی كوردستان دووهێندەی ساڵی رابردوو بارانی تێدا باری، بۆیە بە بارینی ئەم بارانەش ئەوا سوودی بۆ كشتوكاڵی ناوچە كوێستانییەكان دەبێت.