ئومێد خۆشناو پارێزگاری هەولێر رای گەیاند، لەمڕۆوە دەبێت موەلیدەكان كارەبا بدەنەوە بە هاووڵاتییان و لە سەعات پێنجی ئێوارە بۆ شەشی بەیانی دەبێت.
خۆشناو لە لێدوانێكی رۆژنامەوانیدا گوتی، ئەو دۆخەی كە بڕیارە موەلیدەكان كاری پێ بكەنەوە، بۆ 10 ڕۆژ دەبێت و تا ئەو كاتە بەهیواین دۆخەكە ئاسایی ببێتەوە.
هەروەها لەبارەی پارەی موەلیدەكانیش گوتی، نرخی ئەمپێری كارەبای موەلیدە پێنج هەزار دینار دەبێت بۆ 10 ڕۆژ، ئێستە ئەو بڕیارە دراوە و لەمڕۆوە دەبێت بخرێنەوە كار.
ئەوە لە كاتێكدایە كە بەهۆی مەترسیی سەر كێڵگەی كۆرمۆر، كارمەندەكان رێوشوێنی خۆپارێزییان گرتووەتەبەر و ئەوەیش بەرهەمهێنانی كەم كردووەتەوە كە بووەتە هۆی كەمبوونەوەی كارەبا.
هەر ئەمڕۆ مەسروور بارزانی سەرۆك وەزیرانی كوردستان رای گەیاند، ئەو دۆخەی بەسەر كارەبادا هاتووە كاتییە و "لەسەر بەڵێنەكەی خۆمانین كە كارەبای تەواوی كوردستان تا كۆتایی ئەمساڵ ببێتە 24 سەعاتی".