لقی سلێمانیی سەندیكای رۆژنامەنووسانی كوردستان، داوا لە میدیاكانی سنووری پارێزگاكە دەكات، پاراستنی گیانی تەبایی و ورەی جەماوەری كوردستان، لە ئەركە سەرەكییەكانی ئەم قۆناغی كاركردنەی هەموواندا بێت.
لقی سلێمانیی سەندیكای رۆژنامەنووسانی كوردستان ئەوەی ڕوون كردووەتەوە، لەگەڵ دەستپێكردنی شەپۆلی مووشەكباران و جەنگی سیبرانی و شەڕی درۆنی ھەردوو بەرەی جەنگەكە، ئەركی میدیا و بەرپرسیاریەتیی میدیاكاران زیاتر دەبێت.
"داواكارین لە كەناڵەكانمان لە سنووری پارێزگای سلێمانی و دەوروبەری، وردبینی زیاتر و بەرپرسیارێتی و بەئاگابوونی زۆرتر پێڕەو بكەن، پێش بڵاوكردنەوەی ھەر بەپەلە و ھەواڵ و راپۆرتێك كە جیۆگرافیا و وردەكاریی جەنگی پێوە دیار بێت."
لە بەشێكی تری رێنوێنییەكەیدا هاتووە، ھەندێك بابەتی میدیایی دەبنە چاوساغی بۆ لایەنەكانی ھێرشبەر، ھەندێكی تریان دەبنە مایەی رووخانی ورەی شەقام و ھاووڵاتییان: "پاراستنی گیانی تەبایی و ورەی جەماوەری كوردستان لە ئەركە سەرەكییەكانی ئەم قۆناغەمان دەبێت. بۆیە داواكارین بە تەنگ رێنوێنی و داواكارییەكانمانەوە بێن."