پارێزەرێكی راوێژكار رای دەگەیەنێت كە ئەمڕۆ یاداشتێك لەبارەی گرنگی زمانی كوردی لە رێستۆرانت و شوێنە گشتییەكان دەدەنە داواكاری گشتیی.
ئەمڕۆ چوارشەم دووی ئەیلوول، ئاسۆ هاشم پارێزەری راوێژكار، بە "وشە"ی گوت، بێڕێزی بە زمانی كوردی پێشهاتێكی مەترسیدارە و گرتنی گەنجێكی كاسب لە خانەقین لەبەر ئەوەی تابلۆی دوكانەكەی بەزمانی شیرینی كوردی بوە قابیلی قبووڵ نیە.
زیاتر گوتی، لە شاری هەولێر دەیان شوێن و ڕێستورانت هەیە، كە بەزمانی بیانی نووسراون یان بەزمانی كوردی پێشوازی لە میوانەكانیان ناكەن بەهۆی زاڵبوونی زمانی عەرەبی، بۆیە دەبێت ئەوە چارەسەر بكرێت.
دووپاتی كردەوە كە ئەو وەك پارێزەر و لەگەڵ تیمێكی تر ئەمڕۆ لەوبارەیەوە یاداشتێك دەدەن بە داواكارە گشتیی كە لێپێچینەوە لەو شوێنانە بكرێت كە ڕێز لە دەستوور و زمانی كوردی ناگرن و نووسراو بۆ لایەنی پێوەندیدار دەكرێت كە سزای داخستنی ئەو شوێنانەی تێدابێت.
زمانی كوردی بە گوێرەی دەستووری ساڵی 2005ی عێراق ددانپێدانراوە و دەبێت لە هەموو عێراق كاری پێ بكرێت، بەڵام رووداوی چەند رۆژی خانەقین جارێكی تر پێشێلكاری دەستووری دەرخست كە بەهۆی بەكوردی نووسین گەنجێك گیرا.