ئەمڕۆ چوارشەم نۆی ئەیلوولی 2026، لە ڕووداوێکدا لە شارۆکەی کەلار، منداڵێکی تەمەن دوو ساڵان دوای ئەوەی لە ناو سەتڵێک ئاودا دەخنکێت، دەگەیەنرێتە نەخۆشخانە و پزیشکەکان لە دوایین ساتەکاندا دەتوانن ژیانی بۆ بگەڕێننەوە.
لە لێدوانێکی تایبەتدا بۆ "وشە"، د. ڕەفیق قادر بەڕێوەبەری نەخۆشخانەی فریاکەوتنی کەلار، ڕاستیی ڕووداوەکەی پشتڕاست کردەوە و ڕای گەیاند کە منداڵێکی تەمەن دوو ساڵان بە خنکاوی هێنراوەتە نەخۆشخانەکەیان، دوای ئەوەی کەوتبووە ناو سەتڵێک ئاوەوە خنکابوو.
بەڕێوەبەری نەخۆشخانەکە دووپاتی کردەوە، دەستبەجێ تیمە پزیشکییەکان هەوڵەکانی خۆیان خستە گەڕ و خۆشبەختانە توانییان دوای ماوەیەک ژیانی بۆ بگەڕێننەوە و لە خنکان ڕزگاری بکەن، ئێستەش دۆخی تەندروستیی جێگیرە و لە ژێر چاودێریی پزیشکیدایە.