ژمارەی قوربانیانی نقومبوونی كەشتی "فیرگۆ ترانسپۆرت 8" لە كەناراوەكانی دوورگەی كالیمانتانی ئەندەنووسی، ڕووی لە بەرزبوونەوەیە و تا ئێستەیش 66 كەس گیانیان لە دەست داوە و 69ی تریش بێسەرشوێنن.
باسارناس سودایانا
گوتەبێژ بە ناوی ئاژانسی نیشتمانی بەهاناوەچوون و گەڕان ئاشكرای كرد، 243 كەس لەسەر كەشتییەكەدا بوون لەوكاتەی نقومی دەریا بوو، 108یان ڕزگار كراون و 66 گیانیان لە دەست داوە و 69 كەسی تر تا ئێستە بێسەروشوێنن.
زیاتر گوتی، هەڵمەتەكانی گەڕان بۆ دۆزینەوەی بێسەروشوێنان بەردەوامی هەیە و بەشێك لە تیمەكانی ڕزگاركردن لەو باوەڕەدان كە تا ئێستەیش بەشی زۆری بێسەروشوێنان لە ناو پاشماوەكانی كەشتییەكە گیریانخوارد بێت.
هێمای بۆ ئەوەیش كرد، لەو سۆنگەیەوە تیمەكانی مەلەوانی چوونەتە ناو قووڵایی دەریاوە و بە دوای بێسەروشوێنان دەگەڕێن.
هەڵمەتەكانی گەڕان بە دوای بێسەروشوێنان تەواوی كەناراوەكانی دوورگەی كالیمانتانی ناوەڕاست و ناوچەی سیرویان و سۆكامارا و كۆتاوارینگینی ڕۆژئاوای گرتووەتەوە.
كەشتیی فیرگۆ ترانسپۆرت 8 لە 13ی ئەیلوول/سێپتێمبەر نقومی دەریا بوو، لەوكاتەوە تا ئێستە هەڵمەتی گەڕان بە دوای بێسەروشوێنان بەردەوامی هەیە.