نێچیرڤان بارزانی سەرۆكی هەرێمی كوردستان، پەیامێكی لە ساڵوەگەڕی كۆچی دوایی جەلال تاڵەبانی بڵاو كردەوە.
لە پەیامەكەدا هاتووە، لە ساڵیادی كۆچی دوایی مام جەلال تاڵەبانیدا، بەوپەڕی ڕێز و پێزانینەوە یادی سەركردەیەكی گەورەی نیشتمانی دەكەینەوە كە ژیانی خۆی بۆ خەبات لەپێناو مافەكانی گەلی كوردستان و خزمەتكردنی عێراق تەرخان كرد و لە سەختترین قۆناغەكاندا دەنگی گفتوگۆ، لێكگەیشتن و كاری پێكەوەیی بوو.
" باشترین وەفاداری بۆ یاد و میراتی مام جەلال ئەوەیە كە گفتوگۆ، تەبایی و یەكڕیزی بكەینە ڕێگەی چارەسەركردنی ناكۆكییەكان و پێكەوە كار بكەین بۆ پاراستنی ماف و دەستكەوتەكانی گەلی كوردستان و چەسپاندنی هاوبەشی و سەقامگیری لە عێراق" سەرۆكی هەرێمی كوردستان وای نووسیوە.
جەلال تاڵەبانی رۆژی 3/10/2017 لە ئەڵمانیا كۆچی دوایی كرد و دواتر لە رێوڕەسمێكدا تەرمەكەی گەڕێنرایەوە كوردستان و لە گردی دەباشانی سلێمانی بە خاك سپێردرا.