گرووپێكی شاخەوانی ئاكرێ، گەشتێكیان بۆ سەر چیای ئاكرێ ئەنجام دا و لەوێ بۆ یەكەمجار چەند بەردێكی جوان و ناوازە دەدۆزنەوە كە مێژووەكەیان بۆ زیاتر لە 600 هەزار ساڵ دەگەڕێتەوە.
ئەمڕۆ چوارشەم 10ـی تشرینی یەكەم، عەبدوڵا ئەلیاس سەرۆكی گرووپی شاخەوانی ئاكرێ بە "وشە"ـی راگەیاند، گەشتێكمان بۆ چیای ئاكرێ و دەوروبەری ئەنجام دا كە پێكهاتبووین لە كۆمەڵێك لە شاخەوانی كچ و كوڕ.
سەرۆكی گرووپی شاخەوانانی ئاكرێ گوتی، لە چوارچێوەی گەشتەكەدا هەندێ بەردی جوان و ناوازەی رەنگ سپی و نەخشێنراو دۆزراونەتەوە كە زۆر جوان و نایابن و لەسەر شێوەی ئەڵماس و مەرجانن.
ئاماژەی دا، بەپێی بەدواچوونی ئێمە و زانیاری فەلەكناسانی كوردستان، ئەو جۆرە بەردانە كەموێنەن و مێژووەكەیان دەگەڕێتەوە بۆ نزیكەی 600 هەزار ساڵ پێش ئێستە، بەردەكان لە ئەنجامی هەڵچوونی دەریا هاتوونەتە ئەو شوێنە كە ئەمەش مانای وابووە پێشتر شوێنەكە كەوتووەتە ژێر دەریا و ناوچەكە بە تەواوی نقوم بووە، وێنەی گیاندارەكانیان تێدایە كە دواتر بوونەتە بەرد. ئێستە ئەو بەردانەمان هێناوەتە ماڵەوە لە ئاكرێ و بۆ جوانكاری ناوماڵ و دانان لەسەر شوێنە تایبەتییەكان دانراون.
ئاكرێ/ نەوزاد هلوری