زۆر رێگای باو هەیە بۆ رێگریكردن لە جەڵتە، وەكو باشتركردنی تەندروستی لەش، خواردنی خۆراكی تەندروست رۆڵێكی گرنگ دەبینێت لە دیاریكردن و روودانی مەترسییەكانی جەڵتە. لێرەدا باس لەو رێگایانە دەكەین كە مەترسییەكانی جەڵتەی دڵ و مێشك كەم دەكەنەوە كە بە هۆیەكی دیار دادەنرێت بۆ مردن بەتایبەتی لەو كەسانەی كە كێشان زۆرە یان بەتەمەنن.
ئەو
رێگایانەی مەترسییەكانی جەڵتە كەم دەكەنەوە:
یەكەم: كاربۆهیدراتی دروست هەڵبژێرە، هەموو كاربۆهیدراتەكان دروستن بۆ لەش، بەڵام كاتێك باس لە نەخۆشییەكانی دڵ و بۆرییەكانی خوێن رێگریكردن لە جەڵتە دەكرێت دەبێت ئەو خۆراكانە بەكاربهێنرێت كە دەوڵەمەندن بە ریشاڵ و میوەی تازە و سەوزە زۆر بخورێت، باشتر وایە بەدوور بیت لە خواردنی چوكلێت و خۆراكی ئامادەكراو، چونكە دەبێتە هۆی بەرزكردنەوەی گلوكۆزی خوێن و بەمەش خوێنبەرەكانی دڵ و مێشك تووشی گیران و تەسك بوونەوە دەبن.
دووەم: خۆراكی دروست بخۆ، خواردنی میوە و سەوزەی تازە پێوەندی هەیە بە كەمكردنەوەی مەترسییەكانی نەخۆشی دڵ و جەڵتە و بۆرییەكانی خوێنەوە، چونكە سەرچاوەی دروستكردنی وزەن لەگەڵ بەخشینی برێكی زۆر پێكهاتەی خۆراكی گرنگ بەلەش وەكو كانزای مەگنیسیۆم و پۆتاسیۆم و ڤیتامین و ریشاڵ دژەئۆكسیدەكان.ئەم خۆراكانە بەشێوەیەكی سروشتی چەوری نەویستراویان نییە بەتاڵن لە خوێ و شەكر.
سێیەم: راهێنانی بەردەوام، وەرزشكردن پێوەندی هەیە بەكەمكردنەوەی چەندان نەخۆشی لە لەشی مرۆڤدا وەكو قەڵەوی و بەرزی پەستانی خوێن. بەپێی كۆمەڵەی دڵی ئەمەریكی و جەڵتە دەڵێت بۆ ئەوەی تووشی نەخۆشییەكانی دڵ و جەڵتە نەبن پێویستە هەر لە تەمەنی هەرزەكاریەوە وەرزش بكرێت بە بەرنامە و هەفتەی سێ بۆ چوار رۆژ بۆ ماوەی 40 خولەك وەرزش بكرێت.
چوارەم: كێشی لەشت كەم بكەرەوە، قەڵەوی هۆكارێكە بۆ نەخۆشییەكانی شەكرە و بەرزبوونەوەی پەستانی خوێن بەمەیش مەترسییەكانی جەڵتە زیاد دەكات. ئەگەر كێشی لەشت زیادە ئەوە مەترسییەكی زۆر لەسەر جەڵتەی دڵ دروست دەكات، چونكە برێكی زۆر چەوری لەسەر دیواری دڵ دەنیشێت و رێگە لە لێدانی دڵ دەگرێت بەشێوەیەكی سروشتی، باشتر وایە بڕی كالۆری كەمبكرێتەوە لە لەشدا بەپێی وزە و پێویستی رۆژانەت بۆ نموونە باشتر وایە رێژەی كالۆری لە 1500 بۆ 2000 زیاتر نەبێت، زیاتر ئەو وەرزشانە بكە كە جوڵەی تێدایە وەكو گۆڵف و رۆشتن بەپێ و یاری تێنس.
پێنجەم: رێژەی كۆڵیسترۆڵ رێكبخە، بەرزبوونەوەی كۆڵیسترۆڵ زیان بە خوێنبەرەكان دەگەیەنێت دەبێتە هۆی جەڵتە و نەخۆشییەكانی تری دڵ. پێویستە رێژەی كۆڵیسترۆڵ 200 mg/dL زیاتر نەبێت و رێژەی LDL خراپ 100 mg/dL بێت و رێژەی چەوری دروست لە 60 mg/dL زیاتر نەبێت. ئەگەر رێژەی كۆڵیسترۆڵت لەم رێژانە زیاتر بوو ئەوە پێویستە سەردانی پزیشك بكرێت.