چین و ڕووسیا له‌ بۆشایی گه‌ردوون هه‌ڕه‌شه‌ له‌ ئه‌مه‌ریكا ده‌كه‌ن

وه‌زاره‌تی به‌رگری ئه‌مه‌ریكا و ئاژانسی هه‌واڵگری به‌رگری ئه‌و وڵاته‌ له‌ ڕاپۆرتێكدا ئاشكرای كردووه‌، كه‌ چین و ڕووسیا توانای خۆیان له‌ گه‌ردوون به‌ره‌و پێشه‌وه‌ بردووه‌ و ده‌توانن له‌ بۆشایی ئاسمان هه‌ڕه‌شه‌ له‌ ئه‌مه‌ریكا و هه‌ژموونی واشنتن بكه‌ن، به‌تایبه‌ت له‌ ڕێی تیشكی لیزه‌ره‌وه‌ ده‌توانن مانگه‌ ده‌ستكرده‌كانی واشنتن تێكبشكێنن.

له‌ ڕاپۆرته‌كه‌ هاتووه‌، چین و ڕووسیا له‌ چه‌ند ساڵی ڕابردوو زۆر به‌ وردی و خێرایی په‌ره‌یان به‌ بۆشایی ئاسمان داوه‌ و ده‌یانه‌وێ ململانێی ئه‌مه‌ریكا بكه‌ن، بۆ ئه‌و مه‌به‌سته‌یش هه‌نگاوی گرنگیان بڕیوه‌ و ئێسته‌ ده‌توانن ببن به‌ گه‌وره‌ترین هه‌ڕه‌شه‌ بۆ سه‌ر چالاكییه‌كانی ویلایه‌ته‌ یه‌كگرتووه‌كانی ئه‌مه‌ریكا له‌ بۆشایی ئاسمان.

ئاماژه‌ی داوه‌، ئه‌وان كار له‌سه‌ر دیارییكردنی مانگه‌ ده‌ستكرده‌كانی ئه‌مه‌ریكا له‌ ئاسمان ده‌كه‌ن و شوێن و جوڵه‌یان تۆمار ده‌كه‌ن و چاودێرییان ده‌كه‌ن.

له‌ به‌شێكی تری ڕاپۆرته‌كه‌ هاتووه‌، هه‌ردوو وڵات زانیاری هه‌واڵگری و هه‌ڵمه‌تی چاودێری بۆشایی ئاسمانیان زۆر زیادی كردووه‌، هه‌موو ئه‌و هه‌وڵانه‌یش بۆ ئه‌وه‌یه‌ كۆسپ و ته‌گه‌ره‌ بۆ پلان و پرۆگرامه‌كانی ئه‌مه‌ریكا له‌ بۆشایی ئاسمان دروست بكه‌ن، هاوكات كۆماری ئیسلامی ئێران و كۆریای باكوریش توانای ئه‌وه‌یان هه‌یه‌ كه‌ كێشه‌ و ژاوه‌ ژاو له‌ ئاسمان بڵاو بكه‌نه‌وه‌ و ڕێ له‌ گه‌یشتنی داتا و زانیاری مانگه‌ ده‌ستكرده‌كان بۆ بنكه‌ ئاسمانییه‌كانی ئه‌مه‌ریكا له‌سه‌ر زه‌وی بگرن.


وشە - باز ئه‌حمه‌د


AM:09:16:12/02/2019




ئه‌م بابه‌ته 68 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌