جۆزیپ ماریا بارتومیۆ سەرۆكی یانەی بەرشەلۆنەی ئیسپانی بابەتی گەڕانەوەی ئەستێرە بەڕازیلییەكەیان نیمار دا سیلڤا لە یانەی پاریس سان جێرمانی فڕەنسی یەكلایی كردەوە.
بارتومیۆ لە چاوپێكەوتنێكدا لەگەڵ رۆژنامەی (ئاس)ی ئیسپانی رایگەیاند: لەم دواییانەدا قسەم لەگەڵ نیمار و باوكی كردووە، ئەوان بەهیچ شێوەیەك پێیان نەگوتووم كە دەیانەوێ بگەڕێنەوە ریزی یانەی بەرشەلۆنە.
زیاتر گوتی: تەنانەت تا ئێستاش بە هیچ ئەندامێكی یانەی بەرشەلۆنەشیان نەگوتووە كە دەیانەوێ بگەڕێنەوە.
سەرۆكی یانەی بەرشەلۆنە هەروەها گوتی: پێموایە یانەی پاریس سان جێرمانیش نایەوێ دەستبەرداری بێت و بیفرۆشێ، بۆیە لێرەوە رایدەگەیەنم كە نیمار ناگەڕێتەوە یانەی بەرشەلۆنە.
بارتومیۆ جەختیشی كردەوە كە دوای نیمار توانیویانە چەند یاریزانێكی لاو و نوێ بهێننە ریزی یانەكەیانەوە وەك دێمبێلێ و كۆتینیو ئێستاش یەكێكن لە یاریزانە سەرەكییەكانی تیپكەیان، ئەمەش هۆكارێكی ترە بۆ ئەوەی نەتوانن نیمار جارێكی تر بگەڕێننەوە.