بە درێژایی مێژوو دوژمنان و داگیركەران بۆ ڕێگری لە خەبات و قوربانیدانی كورد و كوردستان، بۆ گەڕاندنەوەی خاك و شكۆی زەوتكراوی لە رابردوو و ئێستەیشدا، هەموو جۆرە چەك و ئامرازێكیان بەكار هێناوە. دەیان سیناریۆ و چەواشەكارییان گرتە بەر بۆ ئەوەی كورد نەگاتە ئامانج و مافی رەوای خۆی، لە كاتێكدا هەموو ڕۆژێك لە چاوەڕوانیدایە و قوربانیی لە پێناو دەبەخشێت،.
پاش تێپەڕبوونی زیاتر لە سەدەیەك بەسەر گۆڕینی نەخشەی جیۆگرافیای رۆژهەڵاتی ناوەڕاست، بەتایبەتیش ئەو وڵاتانەی دراوسێی كوردستان بوون، لەگەڵ تێكدانی نەخشەی جیۆگرافیای كوردستان كە پێشتر كرابووە دوو بەشەوە لە نێوان عوسمانی و فارسەكاندا، ئەمجارەیان كرایە چوار بەشەوە، واتە پرۆسەی دابەشكردن بەسەر كوردستاندا هێنرا و لەو كارەشدا نەك گوێ لە كورد نەگیرا، بەڵكو بە كوشتوبڕ، ناڕەزاییەكانی كورد لەو رووەوە دامركێنرایەوە. بەو جۆرەش هێشتا ئارەزووی كورد بۆ گەڕانەوە بۆ ئەسڵی خۆی كە جیابوونەوەیە لەوانیتر، وەك خۆی ماوە و رۆژ بە رۆژ بەهێزتر دەبێت.
گەلی كوردستان خاوەنی ئیرادەیە و بەو هێرشانە ناشكێت، بەڵكو پەیامە بۆ خەڵكی كوردستان كە دەبێت یەك بگرن، گەلێك بە درێژایی مێژوو خوێن و گیانی بۆ دروستكردنی قەوارەی خۆی ڕشتووە، لەم دۆخە‌ی ئێستەیدا دەبێت چاو لە گەلی ئۆكراینا بكات، ئەوان به ئیرادەی گەلەوە بەرانبەر بە ئیمپراتۆریایەك وەستاونەوە.
لە دوای كوژرانی قاسم سلێمانی لە ماوەی دوو ساڵی رابردوو، چەندان جار بە پاساوی جۆراوجۆر و چەواشەكاری و بە مووشەك و درۆن هێرش كراوەتە سەر هەولێری پایتەختی هەرێمی كوردستان و چەند ناوچەیەكی تر، زیانی گەورەی مادی و گیانی هەبووە، منداڵی ترساندووە و ژیانی سڤیلی شێواندووە. ئەوانەی هێرش دەكەنە سەر كوردستان، دەیانەوێ ئەو ئارامی و سەقامگیرییەی تێك بدەن، هەروەها هەوڵێكی تریشە بۆ شاردنەوەی ئەو شكست و ناڕەزایی و نائارامییانەی سەرانسەری وڵاتەكەیانی گرتووەتەوە و خەریكە ئیفلیجی دەبات .
ئێستە رووداوەكانی ناوخۆی ئێران گەیشتوونەتە قۆناغێكی تر، لە هەندێك شار و ناوچە شەڕی چەكداری بەرانبەر بەردی خۆپێشاندەران سەری هەڵداوە و سوپای پاسداران كۆمەڵكوژی دەكەن. رۆژ دوای رۆژ ژمارەی كوشتنی ژن و منداڵ لەسەر شەقامەكان زیاتر دەبن، پێویستە لەم قۆناغەیاندا شێوازی پشتیوانی لە خۆپێشاندانەكان بگۆڕێن.
ئێستە كەمپەكانی دوور لە سەتان كیلۆمەتر لە سنوورەكانی ئێران، كە شوێنی ژن و منداڵ و ژیانێكی هەژارانەی ئاساییە، لەژێر هەڕەشەی درۆن و مووشەكی زیرەكدا دەیگوزەرێنن، ئێران هێندە شێتی گرتوویەتی لەوێش لێیان ناگەڕێت و دەیەوێ منداڵەكانیشیان بكوژێ، تەنیا لەبەرئەوەی ترس كەوتووەتە سەر تاران و كچێكی كورد مەشخەڵی شۆڕشەكەیە. بەڵام ئەمجارە كورد تەنیا نییە تا نیازی كۆماری ئیسلامیی بۆ دروستكردنی دوژمنی زۆرەملێ سەر بگرێ، بەڵكو فارس و تورك و عەرەبی ناوخۆی وڵاتەكەیشی رژاونەتە سەر شەقام و سیمبولەكانی دەسووتێنن، بۆیە رێگەی راست دابینكردنی خواستەكانی خۆپێشاندەرانە نەك هێرشی سەر دراوسێ و كەمپەكانی پەنابەران.
لەلایەكی ترەوە، هەموو ئەو بەرەوپێشچوونەی هەرێمی كوردستان لە ماوەی رابردوو بەدەستی هێناوە، هەروەها ئەو ئاسایش و سەقامگیرییەی هەیەتی، بەهێزیی پێگەكەی لە دیپلۆماسییەتدا، هەروەها لەسەر ئاستی ناوخۆ و دەرەوە نموونەیەكی جوانی ئازادی و پێكەوەژیانی لە حوكمڕانیدا پێشان داوە و وڵاتانی زلهێز بایەخی پێ دەدەن. بۆیە چاوی ناحەزان و تێكدەرانی هێندەی تر كوێر كردووە. ئاخر بۆ ئەوان هەزم ناكرێت لە هەرێمی بچووكی تەمەن كەمدا كە ئەگەر حسابی بكەیت هەتا كاتی شەڕی داعشیش، هیچ كات 10 ساڵی ئارامی نەبووە، بەڵام نموونە سیاسییەكەی لە هیچ وڵاتێكی دراوسێشدا وێنەی نییە و هەموو پێكهاتە و ئاینە جیاوازەكان بە ئازادی و مافەكانی خۆیانە مومارەسەی ژیانی تێدا دەكەن، ئەوە بۆ دنیای سەلماندووە كە كورد توانای گەورەی هەیە، بۆیە ئەم وڵاتە داگیركەرانە هەر كە لە شوێنێك تووشی كێشەیەك دەبن، یەكسەر یەخەی كورد دەگرنەوە.
دەبێت دوژمن و داگیركەرانی كوردستان باش لەو راستییە تێبگەن، هەرێمی كوردستان زۆر لەوە گەورەترە بە پەلاماردانی درۆن و مووشەكی ئەوان لە گەیشتن بە ئامانجەكانی پاشگەز بێتەوە، گرنگە وانەیەك لە مێژوویش فێربن كە هەرگیز سڵیان نەكردووەتەوە لە كوشتوبڕی كورد، بەڵام ئەم گەلە سارد نەبووەتەوە چونكە ئامانجەكەی پیرۆزە و دەبێت پێی بگات، خۆ درۆن كاریگەرتر نییە لە كیمیاباران و قڕكردن، بەڵام دوژمن كەوتە ژێر خاك و كورد سەركەوت، ئەم وانەیە بۆ هەموو داگیركەرانی تریش زۆر روونە بۆ ئەوەی فێربن.