رێڤەبەرییا گشتی یا ساخلەمیا پارێزگەها دهۆکێ دیارکر کو د نوکە دا ڤایروسا کۆرۆنایێ ل پارێزگەها دهۆکێ ب شێوەیەکێ زۆر دناڤ کولان و گەرەکان دا بەلاڤبویە، ئەگەر وەلاتی پێگیریێ ب رێنمایێن خوە پاراستنێ نەکەن، دێ پێرابوونێن توند گرنەبەر.
رۆژانە خەلکەکێ زور تووشی کۆرۆنایێ دبیت
حەمزە رەزیکی، بەرپرسێ راگەهاندنا رێڤەبەرییا گشتییا ساخلەمیا پارێزگەها دهۆکێ بۆ "وشە" گوت، چەند رۆژێن بوری هژمارا تووشبوویێن ڤایرۆسا کۆرۆنایێ ل پارێزگەها دهۆکێ ب شێوەییەکێ بەرچاڤ بەر ب بلندبوونێ ڤە چویە و رۆژانە خەلکەکێ زور تووشی کۆرۆنایێ دبیت و گەهشتیە وی رادەی هندەک نەخۆش گیانێ خوە ژ دەست بدەن.
زێدەتر گۆت " وەک رێڤەبەرییا گشتییا ساخلەمیا پارێزگەها دهۆکێ، ب هەموو شیانێن خوە یێن مرۆڤی، ب ئەرکێ چارەسەری و خوەپاراستنێ رابوینە، بگورەی پلانا حوکمەتا هەرێما کوردستانێ بۆ لێگەریان و دەستنیشانکرن و چارەکرنا تووشبوویێن ڤایرۆسا کۆرۆنایێ دچین داکو ب کێمترین زیان لێ دەربازببین، بەلێ وەکو دیارە کو ڤایروسا کۆرۆنایێ ب رێیا کۆم بوون و تێکەلیێن ئێکسەر دهێتە ڤەگۆهاستن، جهێ داخێ یە خەلکەکێ زۆر هەیە پێگیریێ ب رێنمایێن ساخلەمیێ ناکەت ب تایبەت ل جهێن گشتی و تێکەلیێن زۆر ئەنجام ددەن، لەوا ناهێتە کۆنترولکرن ژی"
رەزیکی دیارکر ژی کو ژێدەرێ هندەک تووشبوویێن پارێزگەها دهۆکێ نەدیارە و تووشبوویێن بەرزە هەنە و گوت ژی "باشترین چارەسەری د نوک دا ئەوە کو خەلک خوە دوور بکەن ژ هەموو جورە خرڤەبوون و کۆمبوونان، بێی دەمامک و دەستکێش دەرنەکەڤن، بەرۆڤاژی وەکو ساخلەمیا پارێزگەها دهۆکێ نەچارین پێرابوونێن تۆند وەربگرین،
ل پارێزگەها دهۆکێ 1236 کەس تووشی کۆرۆنایێ بوینە، 10 تووشبوویان گیانێ خوە ژ دەستدایە، دیسان 508 تووشبوو ژی چاکبوینە،، زێدەتر ژ 70% ژ تووشبوویێن پارێزگەها دهۆکێ د حەفتیا بوری دا هاتینە تومارکرن.