سەركردەیەكی یەكێتی نیشتمانیی كوردستان باس لە گرنگی كۆبوونەوەكانی پارتی و یەكێتی دەكات، كە ئامانج لێیان چارەسەركردنی كێشەی خەڵكە، دووپاتی دەكاتەوە، كۆبوونەوەی مەكتەبی سیاسی هەردوولا زۆر كێشە چارەسەر دەكات.
چارەسەری كێشەكان لای پارتی و یەكێتییە
حاجی مەسیفی، ئەندامی سەركردایەتی یەكێتی نیشتمانیی كوردستان ئەمڕۆ سێشەم 11ی ئاب، بە "وشە"ی ڕاگەیاند، كۆبوونەوەكانی پارتی و یەكێتی ئامانج لێیان چارەسەركردنی كێشەی خەڵك و بابەتی مووچە و ئەو هەڕەشە و مەترسیانەیە لەسەر هەرێم هەن، روونی كردەوە، هاووڵاتییان ماندوو بوون و پێویستە پشوویەك بدەن.
زیاتر گوتی، كۆبوونەوەی داهاتووی مەكتەبی سیاسی پارتی دیموكراتی كوردستان و یەكێتی نیشتمانیی كوردستان چارەسەری زۆر پرس دەكات، چونكە ئەو دوو حزبە بڕیار بە دەستی ئەم وڵاتەن و چارەسەری كێشەكان لای ئەوانە.
ئەمڕۆ شاندی پارتی دیموكراتی كوردستان و یەكێتی نیشتمانیی كوردستان لە شارۆكەی دوكانی سەر بە پارێزگای سلێمانی كۆبوونەوە و چەند پرسێكی گرنگی پێوەست بە هەرێم و عێراق و هەڵبژاردنی پێشوەختە تاوتوێ كران.
لە خاڵێكی كۆبوونەوەكەدا ئاماژە بەوە كرا بوو كە بڕیار درا كۆبوونەوەی فراوانی هەردوو مەكتەبی سیاسی پارتی و یەكێتی لە داهاتوویەكی نزیك لە تەلاری سەرۆكایەتی هەرێمی كوردستان لە هەولێر بەڕێوە بچێت.
سلێمانی/ هەستیار عەبدوڵا