دهمهكێ كێم بهری نوكه پارێزگارێ دهۆكێ، فهرهاد ئهترۆشی د كونگرهیهكێ رۆژنامهڤانی دا بهحس ل رهوشا نوكه ل پارێزگهها دهۆكێ كر و داوی رێنما و پێرابوونێن پارێزگههێ بۆ قهدهغهیا هاتن و چوونێ راگههاندن.
فهرهاد ئهترۆشی پارێزگهها دهۆكێ دیاركر ژی كو نوكه ل ئوتێل و موتێل و جهێن دیاركری بو كهرهنتینكرنێ، جهێ خهلكی نهمایه و دڤێت خهلك هاریكاربن و زێدهتر گۆت "داكو كاروبارێن ستافێ ساخلهمیێ و هێزێن ئهمنی بۆ كونترۆلكرنا حالهتێن نوكه پهیدا بوی و دهستنیشانكرنا وان كهسانێن بهركهفتن كری، دێ قهدهغهیا هاتن و چوونێ بۆ 24 دهمژمێران ل پارێزگهها دهۆكێ هێته درێژكرن، سوپاسیا وان سهرمایهدار و زهنگینان دكهین كو هاریكار بوون ل گهل پارێزگهها دهۆكێ بۆ رادهستكرنا ئوتێلان بو كهرهنتینكرنا خهلكی، د نوكه دا رهوشا پارێزگهها دهۆكێ خراپه و فشارهكا زور ل سهر زالگههان ههیه"
مه هژمارهكا بریار و ئاسانكارییان بو خهلكێ پارێزگهها دهۆكێ داینه
زێدهتر گۆت "مه هژمارهكا بریار و ئاسانكارییان بو خهلكێ پارێزگهها دهۆكێ داینه، وهك پارێزگهها دهۆكێ پابهندیێ ب ههموو بڕیار و رێنما و یاسایێن حكوومهتا ههرێما كوردستانێ دكهین، ل پارێزگهها دهۆكێ ماركێت و بازارێن فروتنا كهسكاتی و گومرك و بازارێن سپیاتی و پانزینخانه و نانپێژی گهلهك جهێن دی یێن گرێدای ژیانا خهلكی هێنه ڤهكرن ب گورهی رێنما"
ژلایهكێ دیڤه، نزار عسمهت رێڤهبهرێ گشتیێ ساخلهمیا پارێزگهها دهۆكێ د كونگرهی دا گۆت، "ژ روژا ئێكێ یا دهركهفتنا كۆرۆنایێ ههتا نوكه ئهم دوپاتیێ ل مهترسیا كۆرۆنایێ دكهین، بهلێ خهلكی ترانه ب مهكرن، ئهگهر ئهم پابهندیێ ب رێنمایێن ساخلهمیێ نهكهین دێ رهوش خراپتر بیت، نوكه د دوو حهفتیان دا 70ێ حالهت ههنه، پرانیا وان ژ دهرڤهیێ پارێزگههێ هاتینه ب تایبهتی ل عێراقێ، د نوكه دا ژێدهرێ دوو حالهتێن كۆرۆنایێ ل دهۆكێ دیار نینه"
زێدهتر گۆت "بو بهرسینگرتنا كۆرۆنایێ دێ ههموو پێرابوونان هێنهكرن، 500 بهركهفتی ژ نانخوارنهكا دهۆكێ هاتینه دهستنیشانكرن، نهخۆشخانێن دهۆكێ پرن ژ تووشبوویێن كۆرۆنایێ، نوكه كار بۆ ڤهكرنا نهخۆشخانهكا دی دهێنهكرن، ههكه تووشبوو بهردهوام بن دێ نهخۆشخانا ئازادی ل دهۆكێ و ئێك ژی ل زاخۆ و ئێك ژی ل دهۆكێ هێنه ڤالاكرن"
دهۆك/ نهوزاد هلوری