دواى 171 ساڵ چیرۆكێكى لویزا ماى بڵاو ده‌بێته‌وه‌

دیمه‌نێك له‌ فیلمى "ژنه‌ بچووكه‌كان" كه‌ له‌ رۆمانێكى لویزا ماى وه‌رگیراوه‌
:: AM:11:58:29/06/2020 ‌
گۆڤارێكى ئه‌مه‌ریكى بڕیارى داوه‌ كتێبێكى لویزاى ماى ئالكۆت بڵاو بكاته‌وه‌ به‌ ناوى "یاداشتى رۆژانه‌ى پووره‌ نیلى". لویزا  نووسه‌رێكى ئه‌مه‌ریكییه‌ و به‌ رۆمانى "ژنه‌ بچووكه‌كان " له‌سه‌ر ئاستى دنیا ناسراوه‌.

رۆژنامه‌ى ئێندپێندنتى به‌ریتانى بڵاوى كردووه‌ته‌وه‌، گۆڤارى ئه‌مه‌ریكى "زه‌ ستراند" بڕیارى داوه‌ ده‌ستنووسێكى لویزا ماى ئالكۆت وه‌ك كتێب بڵاو بكاته‌وه‌ كه‌ چیرۆكێكى ته‌واونه‌كراوى ئه‌و ژنه‌یه‌ و له‌ 44  لاپه‌ڕه‌ پێكاتووه‌.

چیرۆكه‌كه‌ 171 ساڵ له‌مه‌وبه‌ر نووسراوه‌

چیرۆكه‌كه‌ به‌ ناوى "یاداشتى رۆژانه‌ى پووره‌ نیلى" Aunt Nellie‌s Diary  نووسراوه‌ و  ناوه‌ڕۆكه‌كه‌ى باس له‌ تێڕوانینى كچێكى گه‌نج ده‌كات بۆ ژیان و رۆژنامه‌ به‌ریتانییه‌كه‌ ده‌ڵێ، "چیرۆكه‌كه‌ به‌ تێڕوانینێكى ده‌روونى قووڵ نووسراوه‌".

 ئه‌وه‌ى جێى سه‌رنجه‌ چیرۆكه‌كه‌ ته‌واو نه‌كراوه‌ و ده‌زگاكه‌ بڕیارى داوه‌ نووسه‌رێك راسپێرێ بۆ ته‌واوكردنى.

 ده‌قى نووسینه‌كه‌ى لویزاى ماى ئالكۆت له‌ ساڵى 1849 نووسراوه‌، له‌ نۆ هه‌زار وشه‌ پێكهاتووه‌ و یاداشتى نۆ رۆژى جیاوازه‌.

لویزا ماى ئالكۆت " louisa may alcott" نووسه‌رێكى ئه‌مه‌ریكییه‌ له‌ ساڵى 1832 له‌ دایك بووه‌ و له‌ ساڵى 1888 مردووه‌، له‌سه‌ر ئاستى دنیا به‌ چیرۆكى "ژنه‌ بچووكه‌كان- Little Women" ناسراوه‌، كه‌ ساڵى رابردوو كرا به‌ فیلمێكى سینه‌مایى.
  





وشە - فه‌یسه‌ڵ خه‌لیل

ئه‌م بابه‌ته 116 جار خوێنراوه‌ته‌وه‌‌