نوژداره‌كێ باژێرێ دهۆكێ كرم و زێلیێن ساخ بۆ چاره‌سه‌ركرنا نه‌خۆشان بكار دئینیت، ئه‌و ژی ب دانانا وان بۆ سه‌ر ده‌ست و له‌شێ نه‌خۆشی، كرم و زێلی خوینا وی یا پیس دكێشیت و بڤێ یه‌كێ نه‌خۆش چاره‌سه‌ر دبیت.
بۆ ده‌ستكه‌فتنا كرمان ئه‌م پشبه‌ستنێ ب وه‌لاتێن بیانی د به‌ستین
دكتۆر عوسمان شنگالی، تایبه‌تمه‌ندێ چاره‌سه‌رییا سروشتی بۆ "وشه" گۆت، ئه‌ڤه چه‌نده‌كه من ل باژێرێ دهۆكێ ده‌ست ب چاره‌سه‌ركرنا نه‌خۆشان ب رێیا كرم و زێلیێن ساخ كرییه.
زێده‌تر گۆت "كرم و زێلی بۆ خشوكه‌كێ بچووك و بێ زیان دهێته گوتن و دناڤ ئاخێ دا دژیت، ل جیهانێ و كوردستانێ ژی چه‌ند جۆر و ره‌نگ هه‌نه، هه‌موو بۆ چاره‌سه‌رییا مرۆڤان د باش نینه، ژبه‌ركو هنده‌ك ژ وان د ژه‌هراوی نه، ژبه‌رڤێ بۆ ده‌ستكه‌فتنا كرمان ئه‌م پشبه‌ستنێ ب وه‌لاتێن بیانی د به‌ستین ب تایبه‌تی توركیا"
دكتۆرێ ناڤبری دیاركر ژی كو ل كوردستانێ ژی ئه‌ڤ جورێ كرمان ب چه‌ند جور و ره‌نگان هه‌نه و د شیاندایه كو مفای لێ وه‌ربگرن، به‌لێ نه‌بوونا سه‌نته‌رێن تایبه‌ت ب خودانكرنا وان هه‌تا نوكه چوو مفا ژ ئه‌ڤان جورێن كرم و زێلیان نه‌هاتیه وه‌رگرتن و گۆت ژی، "كرم دهێنه بكارئینان بۆ پانكرنا ده‌مارێن خوینێ، كێشانا خوینا پیس یا له‌شی و جه‌لته‌یێن خوینێ ژی د له‌شێ مرۆڤیدا ناهێلیت، كرم و زێلی پشتی دهێنه برسیكرن ددانه سه‌ر له‌شێ نه‌خۆشی ب تایبه‌تی ده‌ستان، ئه‌و كرمه دێ خوینا له‌شێ نه‌خۆشی یا پیس هه‌مویێ مێژیت و خوت و كێشیت، بڤێ یه‌كێ بۆ چه‌ند جاره‌كا چاره‌سه‌ر دبیت"
دكتۆر عوسمان شنگالی، كو سه‌نته‌ر و كلینیكه‌كا تایبه‌ت ل باژێرێ دهۆكێ دانایه و رۆژانه هژماره‌كا خه‌لكێ كوردستان و پارێزگه‌ها دهۆكێ قه‌ست دكه‌تێ، زێده‌تر گۆت "ژبلی خه‌لكێ ده‌ڤه‌رێن جودایێن هه‌رێما كوردستان و پارێزگه‌ها دهۆكێ، هه‌ڤده‌م گه‌له‌ك خه‌لكی ل ده‌رڤه‌یێ كوردستانێ ژی قه‌ستا ده‌ڤ مه كرییه و ئه‌ڤ جورێ چاره‌سه‌ریێ بكارئینایه و مافی ژی لێ وه‌رگرتییه".