دهما چوار سالایه بهغدا ئاریشهیا وهرگرتنا گهنمى بۆ جووتیارێن ههرێما كوردستانێ دروست دكهت، ئهڤه زێدهبارى ئهو گهنمێ هاتییه وهرگرتن ژى چهكێ وان ههموو نهدایه، جووتیارێن ههرێما كوردستانێ گهلهك زێدهتر ژ وێ رێژێ یا بهغدا دیاركرى كو ل سایلویان وهربگریت، گهنم بهرههمئینایه، رێڤهبهرێ كومپانیا بازرگانییا دخلودانى ل پارێزگهها دهۆكێ و رێڤهبهرێ سایلویا فهیدیێ دیاركر كو ئاریشا ل گهل بهغدا زێدهتر سیاسییه، لهوا دنوكه دا بزاڤ دهێنهكرن ههرێما كوردستانێ گهنمێ جووتیاران وهربگریت.
600 تۆنێن گهنمى ل پارێزگهها دهۆكێ هاتینه بهرههمئینان و بهغدا تنێ دێ 115 هزار تۆنان وهرگریت
نازم محهمهد رێڤهبهرێ كومپانیا بازرگانییا دخلودانى ل پارێزگهها دهۆكێ و رێڤهبهرێ سایلویا فهیدیێ بۆ "وشه" دیاركر كو وهزارهتا چاندنا عێراقێ ئهڤ ساله نێزیكێ دوو ملیون تۆن داخوازكرنه كو ل سایلویان وهربگریت، بهلێ ژ وێ هژمارێ تنێ رهزامهندى ل سهر 390 هزار تۆنان هاتهدان كو ژ جووتیارێن ههرێما كوردستانێ وهربگریت.
زێدهتر گۆت "ژ وێ هژمارێ بههرا پارێزگهها دهۆكێ ب تنێ 115 هزار تۆنن، بۆ ههرسێ سایلویێن شێخان و فهیدیێ و زاخۆ هێنه، بهلێ جهێ داخێ یه پترى 400 هزار تۆنێن گهنمێ جووتیاران ناهێته وهرگرتن ژبهركو رێژه زۆر كێم هاتییه دیاركرن ل بهغدا، ئانكو پترى 600 هزار تۆنێن گهنمى ل پارێزگهها دهۆكێ هاتینه بهرههمئینان و تنێ 115 هزار تۆن دێ ژلایێ بهغدا هێنه وهرگرتن"
ناڤبرى خویاكر ژى كو پێشتر حكوومهتا ههرێما كوردستانێ پڕۆژهیهك ب رێیا وهزارهتا چاندنێ ههبوو كو ئهو ژى گهنمێ جووتیاران یێ كو ل بهغدا نههێته وهرگرتن ب كریت، بۆ ڤێ مهرهمێ لژنهكا ههڤپشك ژ وهزارهتێن پێوهندیدار هاتبویه پێكئینان و گۆت، "قهیرانا دارایى و پهژیكا كۆرۆنایێ بوویه ئهگهر جارهكا دى وهكو پێدڤى كاروبارێن ب رێڤه نهچن و د نوكه دا چارهنڤیسێ كرینا گهنمێ جووتیاران ناهێته زانین، ئهڤێ یهكێ كارتێكرن ل جووتیارێن ههرێما كوردستانێ ب گشتى و پارێزگهها دهۆكێ ب تایبهتى كرییه و رۆژانه گل و گازنده دهێنهكرن"
نازم محهمهد رێڤهبهرێ كومپانیا بازرگانیا دخلودانى ل پارێزگهها دهۆكێ و رێڤهبهرێ سایلویا فهیدیێ كو ئاریشا جووتیاران ل گهل بهغدا ههر بتنێ نه وهرگرتنا گهنمى نینه، بهلكو نهدانا چهكێ وان ژى ئاریشهیه و خویاركر كو ئهڤ یهك زێدهتر سیاسییه و گۆت، "18 ملیار دینارێن جووتیاران ل سالا 2014 نههاتینه وهرگرتن، ل سالا 2015 ژى 71 ملیار، ل سالا 2016 ژى 83 ملیار دینار، ههتا نوكه بهغدا ب تنێ سێ چهك خهرجكرنه كو ئهو ژى شهش ملیار دینارێن سالا 2024 و 27 ملیارێن سالا 2015 و یێن سالا 2016 ژى 53 ملیار دینار بوون.
ئهو ژی گۆت، بهانهیا بهغدا ژ نهدانا چهكێ مایى ئهوه كو رێژا گهنمى زێده بو بهغدا هاتییه رهوانهكرن و بێگومان ئهڤ یهك ژى غهدرهكا مهزنه ل جووتیاران دهێته كرن، زولمهكا ئاشكرایه چونكى ههرێما كوردستانێ ب گورهى یاسا و رێنمایێن بهغدا گهنم وهرگرتییه و رهوانه كرییه، ئهگهر سهروك وهزیرانێن عیراقێ بهێته سهرخهت و كێشه ژ روویێ سیاسى بهێته چارهسهركرن، ئهو پارێ مایى ههموو دێ بۆ جووتیاران هێته خهرجكرن، ژبهركو ئهو پاره ژ وهزارهتا دارایى چوویه سهر حسابا وهزارهتا بازرگانی ئانكو تنێ پێدڤى ب رهزامهندیێ یه"
رێڤهبهرێ كومپانیا بازرگانیا دخلودانى ل پارێزگهها دهۆكێ و رێڤهبهرێ سایلویا فهیدیێ، ئاماژه ب وێ یهكێ ژ كر كو وهكو پێدڤى سایلو بۆ وهرگرتنا گهنمى ل پارێزگهها دهۆكێ نینه و نهبوونا وان ژى كێشه بۆ وان و جووتیاران دروستكرییه، زێدهتر گۆت "تنێ سایلویا روڤیا سهر ب ههرێما كوردستانێ یه و ژبهر قهیرانا دارایى هێشتا داوى نههاتییه، سایلویا فهیدیێ و سایلویا شێخان سهر ب عێراقێیه، بهلێ دپلاندایه دوو سایلو ژلایێ وهزارهتا بازرگانییا ههرێما كوردستانێ ل سنوورێ پارێزگهها دهۆكێ بهێنه چێكرن كو ئێك ژ وان دێ ل ناحیا باتێلێ هێته چێكرن،"
دهێته زانین گهنمێ پله ئێك ب كوژمێ 560 هزار دیناران دهێته وهرگرتن، گهنمێ پله دوو ب كوژمێ 480 هزار دیناران و پلا سێ ژى ب كوژمێ 420 هزار دیناران دهێته وهرگرتن.
دهۆك – نهوزاد هلۆرى