ده‌مه‌كێ كێم به‌ری نوكه ژ ئه‌گه‌رێ شوته‌كێ كاره‌بێ ئاگر به‌ربوویه ژماره‌كا خیڤه‌تێن ناڤا كه‌مپا كه‌به‌رتوو یا سه‌ر ب پارێزگه‌ها دهۆكێ و زیانێن زورێن مادی پێگه‌یاندن.
زیانێن گیانی نینن، به‌لكو تنێ ماددی هه‌نه
ئه‌ڤرۆ چوارشه‌مبی پێنجێ ئاب، باسم شنگالی رونشتڤانێن كه‌مپا كه‌به‌رتوو یا ئاواره‌یێن شنگالێ بۆ "وشه" گۆت، ده‌مه‌كێ كێم به‌ری نوكه ژ ئه‌گه‌رێ شوته‌كێ كاره‌بێ ئاگر به‌ربوویه خیڤه‌تێن ناڤا كه‌مپا كه‌به‌رتوو.
زێده‌تر گۆت "ده‌ستپێكێ ئاگر به‌ربوویه تنێ ئێك خیڤه‌ت، پاشی چوویه خیڤه‌تێن دی، هه‌تاكو هاتییه كونترولكرن پێنج خیڤه‌ت سووتن، جهێ داخێ یه زیانێن زور یێن ماددی هه‌نه"
ناڤبری دیاركر ژی كو خه‌لكێ ناڤا كه‌مپێ هه‌ڤكاری ل گه‌ل به‌ره‌ڤانیا باژێری شیان ئاگری كونترول بكه‌ن و گۆت ژی "سوپاس بو خودێ چوو زیانێن گیانی نینن، به‌لكو تنێ ماددی هه‌نه"
كه‌مپا كه‌به‌رتوو تایبه‌ته ب ئاواره‌یێن شنگالێ و پتری دوو هزار خێزانان تێدا دژین، هاتیه دابه‌شكرن بو دوو كه‌رتا، ئه‌ڤ ساله هه‌تا نوكه پێنج روودانێن سوتنا خیڤه‌ت و كه‌ره‌ڤانێن ناڤا كه‌مپێن پارێزگه‌ها دهۆكێ دورست بوینه و د ئه‌نجام دا هژماره‌كا خیڤه‌تان سووتینه.