بلندبوونا ئاستێ چاكبوونا حاله‌تێن تووشبوو ب ڤایرۆسا كۆرۆنایێ، بویه ئه‌گه‌ر كو هژماره‌ك ژ كومپانیێن ده‌رمانان په‌نایێ بۆ پروپاكنده و ریكلامێن نوژداری وه‌كو چاره‌سه‌ری بۆ كۆرۆنایێ ببه‌ن، نوژداره‌ك دیار دكه‌ت كو كومپانیێن دیشله‌م و ئاسكرێمێ ژی دشێن بێژن كۆرۆنا ب ئاسكرێمێ یان دیشله‌مێ ژناڤ دچیت.
پتری 90% ژ حاله‌تێن تووشبوون ب ڤایرۆسا كۆرۆنایێ ئاسته‌كێ لاواز هه‌یه و ب خوه چاك دبن
جه‌گه‌ر عه‌بدوللا رێكانی، تایبه‌مه‌ندێ سركرن و نه‌خۆشیێن په‌ژیكا ل ئه‌مریكا بۆ "وشه" گۆت، پتری 90% ژ حاله‌تێن تووشبوون ب ڤایرۆسا كۆرۆنایێ ئاسته‌كێ لاواز هه‌یه و ب خوه چاك دبن بێی كو پێدڤی بكارئینانا چاره‌سه‌ریێن نوژداری ببن.
زێده‌تر گۆت "ژبه‌ركو رێژا چاكبوونێ زوره، پشكه‌ك ژ كومپانیێن ده‌رمانان و نوژداری بخوه ب ده‌لیڤه دبینن پروپاكنده و ریكلاما چاكبوونا حاله‌تێن كۆرۆنایێ ب ده‌رمانێن خوه بكه‌ن، وه‌سا بۆ خه‌لكی دده‌ن دیاركرن كو ب ده‌رمانێن وان تووشبوو چاكبوینه، ئه‌ڤ یه‌ك چوو راستی بۆ نینه و تنێ خاپاندنا خه‌لكی یه، بو نموونه ئه‌گه‌ر 70ێ تووشبوویێن سڤك هه‌بن، بێی بكارئینانا ده‌رمانان دێ چاك بن ڤه، له‌وا كومپانیێن ده‌رمانان ده‌مێ ده‌رمانه‌كێ دده‌ن تووشبوویا دێ وه‌سا دیاركه‌ن كو ب هێزا ده‌رمانێن وان چاكبوینه، بڤێ یه‌كێ دێ شێن رێژه‌ییه‌كا باش یا ده‌رمانێن خوه فروشن"
ناڤبری دیاركر ژی كو ب گوره‌ی رێسا ل سه‌ری كومپانیێن دیشله‌م و ئاسكریم و كومپانیێن دن ژی دشێن چاره‌سه‌ریا بۆ تووشبوویێن كۆرۆنایێ بكه‌ن، وه‌سا بو خه‌لكی بده‌ن دیاركرن كو ئه‌و 70ێ تووشبویێن كۆرۆنایێ ب دیشله‌م و ئاسكریمێ چاكبوینه و گۆت ژی "دڤێت وه‌لاتی و تووشبوو نه‌كه‌ڤنه بن چوو پروپاكنده و ریكلامێن كومپانیان، یا گرنگ ئه‌وه حاله‌تێن دژوار یێن تووشبوون ب كۆرۆنایێ بهێته چاره‌سه‌ركرن، جهێ داخێ یه هه‌تا نوكه چوو چاره‌سه‌ری بۆ كۆرۆنایێ نه‌هاتینه دیتن"
دهۆك - نه‌وزاد هلۆری: