چه‌ند رۆژێن بورى وه‌زاره‌تا ره‌وشه‌نبیرى و لاوان یا حوكمه‌تا هه‌رێما كوردستانێ دیاركر كو تنێ وه‌زاره‌تێ مافێ دانا هژمارا سپاردنێ بۆ چاپكرن و به‌لاڤكرنا په‌رتووكێن نوو هه‌یه، ئه‌ڤێ یه‌كێ كارڤه‌دان ل دهۆكێ دروستكرن، رێڤه‌به‌رییا په‌رتوكخانا به‌درخانیان ل دهوكێ دیاركر كو پارێزگه‌ها دهۆكێ ناكه‌ڤیته ژێر بریارا وه‌زاره‌تێ و نڤیسه‌ر هه‌ر ل دهۆكێ دێ هژمارا سپاردنێ وه‌رگرن.
ئیسماعیل تاهر جانگیر، رێڤه‌به‌رێ په‌رتوكخانا به‌درخانیان كو په‌رتوكخانه‌كا گشتى یا حوكمى یه و سه‌رپه‌رشتیا هه‌موو په‌رتوكخانێن گشتى ل پارێزگه‌ها دهۆكێ دكه‌ت بۆ "وشه" گۆت، پشتى هه‌ول و بزاڤ و كومبوون و دانوستاندنێن زۆر ب پشته‌ڤانى و خه‌مخوریا نڤیسه‌ران ل پارێزگه‌ها دهۆكێ، وه‌زاره‌تا ره‌وشه‌نبیرى و لاوان یا حوكمه‌تا هه‌رێما كوردستانێ ئه‌م ئاگه‌هداركرین كو پارێزگه‌ها دهۆكێ دشێن سه‌ربخوه هژمارا سپاردنێ وه‌ربگرن.
زێده‌تر گۆت "پارێزگه‌ها دهۆكێ وه‌كو به‌رێ دێ هه‌ر ل دهۆكێ هژمارا سپاردنێ وه‌رگرن و هه‌ر نڤیسه‌ره‌ك ژى بخوازیت دشێت كێمتر ژ 10 خوله‌كا وه‌ربگریت، ئه‌و ژى نڤیسه‌ر دێ په‌رتووكا خوه ب رێیا PDF و ناسنامه‌كا كوپى پێشكێشى په‌رتوكخانا به‌درخانیان كه‌ت و هژمارا سپاردنێ ب رێیا ئه‌لیكترونى یان ب هێله‌فوونێ ناهێنه‌دان، به‌لكو نڤیسه‌ر یان نوونه‌رێ ده‌زگه‌هێ وه‌شانێ دێ ل په‌رتوكخانێ به‌رهه‌ڤ بیت و هژمارێ ئیمزا و مور كه‌ت و وه‌رگریت"
ناڤبرى دیاركر ژى كو ئه‌ڤرۆ وێڤه ئه‌ڤ بریاره دێ كارپێ هێته‌كرن و گۆت ژى "بۆ وه‌رگرتنا ژمارا سپاردنێ پێدڤى یه نڤیسه‌ر یان نوێنه‌رێ وه‌شانخانێ ڤان پێدڤیان ل گه‌ل خوبینن، دانه‌كا (PDF) یا په‌رتۆكێ، دانه‌كا كۆپى یا ناسناما نڤیسه‌رى، جۆرێ په‌رتۆكێ، چه‌ند دانه دێ ژێ چاپ بن، ناڤێ چاپخانێ، دیسان هه‌موو چاپخانه وده‌زگه‌هێن چاپێ هاتینه ئاگه‌هداركرن كو نابیت بێى نڤیسارا فه‌رمیا په‌رتۆكخانا به‌درخانیان چ په‌رتۆك ل سنوورێ پارێزگه‌ها دهۆكێ چاپ ببن.
ئه‌ڤ ساله پترى 730 په‌رتووك ل پارێزگه‌ها دهۆكێ هاتینه چاپكرن و به‌لاڤكرن و هژمارا سپاردنێ ل په‌رتوكخانا به‌درخانیان ل دهۆكێ وه‌رگرتیه.