مەسروور بارزانی سەرۆکی حکوومەتی هەرێمی کوردستان پێشوازیی لە باڵیۆزی هیندستان لە عێراق کرد و کۆ بوونەوە.
ئەمڕۆ یەکشەم 18ی تشرینی یەکەم/ ئۆکتۆبەر، مەسروور بارزانی سەرۆکی حکوومەتی هەرێمی کوردستان، پێشوازیی لە بیرەندەر سینگ یاداڤ باڵیۆزی هیندستان لە عێراق کرد.
بەپێی ڕاگەیەنراوێکی حکوومەتی هەرێمی کوردستان، مەسروور بارزانی و باڵیۆزی هیندستان لە عێراق کۆ بووەوە و پێوەندییەکانی هیندستان لەگەڵ عێراق و هەرێمی کوردستانیان تاوتوێ کرد.
لە ڕاگەیەنراوەکەدا هاتووە، باڵیۆزی هیندستان لە عێراق ئامادەیی وڵاتەکەی بۆ پەرەپێدانی زیاتری پێوەندییەکان لەگەڵ هەرێمی کوردستان دەربڕی، بە تایبەتی لە بواری وزە و کشتوکاڵ و تەکنەلۆجیای زانیاری (IT).
سەرۆکی حکوومەتی هەرێمی کوردستان، تیشکی خستە سەر کارنامەی کابینەی نۆیەم، بەتایبەتی لە بواری پێشکەشکردنی ئاسانکاریی پێویست بۆ وەبەرهێنەرانی ناوخۆ و بیانی.
مەسروور بارزانی سەرۆکی حکوومەتی هەرێمی کوردستان، ئاماژەشی بە پێگەی هەرێمی کوردستان دا کە دەکرێ ببێتە بنکەیەکی بازرگانیی گرنگ لە عێراق و ناوچەکەدا.