حكوومه‌ت كه‌رتی حكوومی و تایبه‌ت پێكه‌وه‌ گرێ ده‌دات

:: AM:11:59:26/10/2020 ‌
به‌ڕێوه‌به‌ری گشتیی وه‌ربه‌رھێنان له‌ پارێزگای دھۆك گوتی، به‌ بڕیاری حكوومه‌تی ھه‌رێمی كوردستان، ھه‌ردوو كه‌رتی حكوومی و تایبه‌ت پێكه‌وه‌ گرێ ده‌درێن، حكوومه‌ت زه‌وی دابین ده‌كات و وه‌به‌رھێنه‌رانیش پڕۆژه‌ی یه‌كه‌ی نیشته‌جێبوون دروست ده‌كه‌ن.

كوردۆ  ئیحسان به‌ڕێوه‌به‌ری وه‌به‌رھێنان له‌ دھۆك به‌ "وشه‌"ی گوت، له‌سه‌ر داوای سه‌رۆكی حكوومه‌ت، حكوومه‌تی ھه‌رێمی كوردستان داوای له‌ ئێمه‌ كردووه‌ ئاماده‌كاری بكه‌ین و بیرۆكه‌كانی خۆمان ڕه‌وانه‌ بكه‌ین بۆ ئه‌وه‌ی ھه‌ردوو كه‌رتی حكوومی و تایبه‌ت به‌یه‌كه‌وه‌ گرێ بدات، حكوومه‌ت خۆی سه‌رپه‌رشتیی بكات و چیتر وه‌به‌رھێنه‌ر به‌ ئاره‌زووی خۆی پڕۆژه‌ی یه‌كه‌ی نیشته‌جێبوون دروست نه‌كات.

به‌پێی بڕیاری سه‌رۆكی حكوومه‌تی هه‌رێمی كوردستان، حكوومه‌ت زه‌وی دابین ده‌كات و وه‌به‌رھێنه‌ریش پڕۆژه‌ی یه‌كه‌ی نیشته‌جێبوونی له‌سه‌ر دروست ده‌كه‌ن، بۆ ئه‌وه‌ی ھاوبه‌ش بن و حكوومه‌ت خۆیشی خاوه‌ندارێتیی پڕۆژه‌كان ده‌كات.

به‌ڕێوه‌به‌ری وه‌به‌رھێنان له‌ دھۆك گوتی، ھه‌ركاتێك ئاماده‌كارییه‌كان ته‌واو بوون، ده‌ست به‌ ھه‌نگاوی كرداری ده‌كرێ، حكوومه‌ت زه‌وی بۆ وه‌به‌رهێنه‌ران دابین ده‌كات و ئه‌وانیش پڕۆژه‌ی یه‌كه‌ی نیشته‌جێبوون به‌ نرخێكی گونجاو و كوالێتیی به‌رز دروست ده‌كه‌ن، به‌ جۆرێك كه‌سانی كه‌مده‌رامه‌تیش بتوانن به‌قیستی درێژخایه‌ن بیكڕن.

زیاتر گوتی، تاوه‌كو ئاماده‌كارییه‌كان ته‌واو نه‌بن، نازانین چه‌ند پڕۆژه‌ ده‌بن و نرخه‌كانیش چۆن ده‌بێت و قیسته‌كان چه‌ند ساڵ ده‌بێت، هه‌موو ئه‌مانه‌ له‌كاتی رێككه‌وتن له‌گه‌ڵ حكوومه‌ت یه‌كلایی ده‌كرێنه‌وه‌.

هه‌ولێر/ بڵند ئیبراھیم
 



وشە - تایبه‌ت

ئه‌م بابه‌ته 63 جار خوێنراوه‌ته‌وه‌‌