ئەندامێكی پەرلەمانی كوردستان ڕای دەگەیەنێت، بەشێك لە كێشەی نێوان هەولێر و بەغدا پێوەندی بە بیركردنەوەی سەدامی بەعس هەیە و كێشەكانی نێوان هەولێر و بەغدا كێشەی دارایی و مووچە و بودجە نییە، بەڵكو كێشەی سیاسی و نەتەوەیی و دەستوورییە.
ئەمڕۆ دووشەم 30ـی تشرینی دووەم، وەیسی سەعید ئەندامی پەرلەمانی كوردستان بە "وشە"ـی ڕاگەیاند، ئەو كێشانەی لە نێوان هەولێر و بەغدا هەیە لە ئەنجامی بیركردنەوەی كەسانێكە لە سەردەمی بەعس هەمان بیركردنەوەیان هەبوو.
دەبێت لەو راستییەش حاڵی بین كێشەكانی نێوان هەولێر و بەغدا كێشەی دارایی و مووچە و بودجە نییە، بەڵكو كێشەی سیاسی و نەتەوەیی و دەستوورییە
زیاتر گوتی، راستە ئێستە هەرێمی كوردستان بەقۆناغێكی سەختی ئابووریدا گوزەر دەكات، بەڵام دەبێت لەو راستییەش حاڵی بین كێشەكانی نێوان هەولێر و بەغدا كێشەی دارایی و مووچە و بودجە نییە، بەڵكو كێشەی سیاسی و نەتەوەیی و دەستوورییە.
باسی لەوەش كرد، ئەو هەنگاوانەی لە ماوەی رابردوودا لە ئەنجوومەنی نوێنەرانی عێراق دەرهەق بە هەرێمی كوردستان پێرەو كران، بەئاشكرا پێچەوانەی دەستوور و سیستمی سازان و هاوبەشی بوون.
ڕوونی كردەوە، هۆكارەكان ئاشكرایە دەیانەوێ ئیرادەی تاكی كورد بشكێنن و بە پرسی دارایی سەرقاڵمان بكەن، لە بابەتە نەتەوەیی و نیشتمانییەكان دوورمان بخەنەوە، بۆیەش گرنگە بەرگەی سەختییەكان بگرین و بەئیرادەی پۆڵاین رووبەڕووی سەختییەكان ببینەوە، چونكە مێژوو سەلماندوویەتی هیچ كات گەلی كوردستان ژیانی زەلیل و ژێردەستەیی قبووڵ ناكات و رۆژە سەختەكانیش تێدەپەڕن.
لەبارەی دواین هەنگاوەكانی حكوومەت بۆ چارەسەری كێشەكان گوتی، حكوومەتی هەرێمی كوردستان سەرقاڵی گفتوگۆكردنە بۆ چارەسەركردنی كێشەكان لەگەڵ حكوومەتی فیدراڵ، بەجۆرێك سازش لەسەر مافە دەستوورییەكان و شایستە داراییەكانی خەڵكی كوردستان نەكرێت.