پشكهكا زۆر ژ وهلاتیان ب رێیا تورێن جڤاكى رێنمایى و راوێژێ ل بارا نهخۆشیێن خوه ل نوژدار و تایبهتمهندێن نوژدارى دكهن و پرانیا وان ژى ل سهر بنهمایێ نیاسین و ههڤالینى بوویه، نوژدارهك ژى ددهت دیاركرن كو ئهڤێ یهكێ كارتێكرنێن خراپ ل سهر نهخۆشى ههیه.
دكتور جهگهر رێكانى، نوژدار و تایبهتمهندێ پهتا و پهژیكا ل ئهمریكا بۆ "وشه" گۆت، چارهسهركرنا نهخۆشیان ب رێیا تورێن جڤاكى ئێكه ژ رێیێن نوو و پشكهك ژ نوژداران ههمبهرى نهخۆشان بكاردئینن.
زێدهتر گۆت "ههر چهنده من بخوه ژى وهكو نوژدار زۆر جاران ب رێیا تورێن جڤاكى ب تایبهتى ژى ل سهر فهیسبوكێ ئهڤ یهك وهكو رێیهكا راوێژكارى و چارهسهریا نهخۆشان بكارئینایه، بهلێ ئهڤێ یهكێ كارتێكرنێن خراپ ل سهر نهخۆشى شوونا چارهسهریێ ههیه"
نوژدارێ ناڤبرى گۆت ژى"پێدڤى یه نوژدار نهخۆشى ب ئامادهبوون ببینیت و ب باشى و هویرى گوهداریا چێرۆكا نهخۆشیا وى ب تمامى بكهت، پاشان هندهك پشكنینان بۆ بكهت و رهوانهى پشكنینێن تاقیگههـ و تیشكى بكهت، ب گورهى ئهوان پشكنینان چارهسهریا وى بكهت، بهرۆڤاژى ڤێ یهكێ شوونا چارهسهریێ دێ كارتێكرنێن خراپ بۆ ههند بۆ ههبن و شوونا هاریكاریێ دێ بیته ئهگهرێ ئازاردان و زیان گههاندن بۆ نهخۆشى ژى"
پهنابرن بۆ چارهسهركرنا نهخۆشان ب رێیا تورێن جڤاكى ل ڤێ دوماهیێ ب شێوهیهكێ بهر بهلاڤ پهیدابویه ب تایبهتى پشتى كو پهژیكا كۆرۆنایێ دهركهفتى و قهدهغهیا هاتن و چونێ هاتیه راگههاندن، ههتا خوه د بورى دا پترى 30 نوژدارێن پارێزگهها دهۆكێ ب رێیا تورێن جڤاكى ناڤونیشان و هژمارێن موبایلێن خوه وهكو هاریكارى و ب خوبهخش بهلاڤكربوون و رێنما و راوژێكاریێن نوژدارى ددانه نهخۆشان.