ئێوارەی ئەمڕۆ دابەزینێكی زۆر لە نرخی دۆلار ڕوویدا و لە بۆرسەكانی بەغدا نرخەكەی گەیشتە خوارووی 145 هەزار دینار.
ئەمڕۆ سێشەم 23ـی ئادار، عەبدولڕەحمان حاجی كەمال خاوەنی نووسینگەكانی نرخ، لە شاری هەولێر، بە "وشە"ـی ڕاگەیاند، نرخی دۆلار ئەمڕۆ لە بازاڕەكانی سلێمانی و بەغدا دابەزینی زۆری بەخۆیەوە بینی بۆرسەی هەولێریش داخراوە.
زیاتر گوتی، تا ئێستە هۆكاری دابەزینەكەی دیاری نەكراوە، بەڵام دوێنێ 100 دۆلاری ئەمەریكی بە 145 هەزار و 650 دینار بوو ئەمڕۆ بووەتە 145 هەزار دینار.
بۆرسەی بەغدا و سلێمانی نوێترین نرخی ئەمڕۆیان بڵاو كردەوە و تێدا لە بۆرسەی سلێمانی نرخی فرۆشتنی 100 دۆلار بە 145 هەزارە و بۆرسەی بەغدا بە 144 هەزار و 950 دینار 100 دۆلاری ئەمەریكی دەفرۆشێت.
بەرزبوونەوە و نزمبوونەوەی نرخی دۆلار بەردەوامی هەیە بەهۆی ناسەقامگیری ئابووری عێراق و دابەزاندنی بەهادی دیناری عێراقی بەرانبەر دۆلاری ئەمەریكی لە سەرەتای ئەمساڵ.