گه‌را هه‌شت یا فلمه ڤێستیڤالا دهۆك یا نیڤده‌وله‌تی نێزیكێ ده‌مێ خوه دبیت و جهێن شوله‌ژێ ژی هه‌موو به‌رهه‌ڤی كرینه و دێ كومه‌كا فلمێن نافخوه و بیانی هێنه نیشاندان و بۆ ده‌ما حه‌فتیه‌كێ ژی به‌رده‌وام بیت، سه‌رۆكێ ڤێستیڤالێ ژی دیاركر كو پرۆژێ نوهات بۆ پێگه‌هاندنا گه‌نجان دوارێ هونه‌ری دا دێ هێته راگه‌هاندن.
ئه‌میر عه‌لی، سه‌رۆكێ فلمه ڤێستیڤالا دهۆك یا نیڤده‌وله‌تی دیاركر كو فلمه ڤێستیڤالا دهۆك یا نیڤده‌وله‌تی به‌رهه‌مێ ماندوبوونا گه‌نجێن دهۆكێ یه و بۆ "وشه" گۆت، خوشحالین كو به‌رهه‌ڤیێن ده‌ستپێكرنا گه‌را هه‌شت یا فلمه ڤێستیڤالا دهۆك یا نیڤده‌وله‌تی و ئومێدا مه ئه‌وه كو یا به‌رده‌وام بیت ل هه‌موو سالان ژی، فلمه ڤێستیڤالا دهۆك یا نیڤده‌وله‌تی زۆر ئارمانج هه‌نه، ژ وان ئه‌وه كو دروستكرنا روویه‌كێ گرنگ یێ شارستانی بۆ باژێرێ دهۆكێ ژ روویێ هونه‌ری، كه‌لتوری و ره‌وشه‌نبیری په‌یدا بكه‌ین كو هه‌ماهه‌نگی دناڤبه‌را سینه‌ماكارێن نافخوه و بیانی په‌یدا بیت، دیسان ئارمانجه‌كا دی ئه‌وه كو زه‌مینه‌یه‌كێ بۆ گه‌نجان په‌یدا بكه‌ین ب تایبه‌تی وان كه‌سانێن كو دخوازن به‌رهه‌م و شیانێن خوه ده‌ربێخن و نیشا جڤاكی بده‌ن، هه‌ر دیسان ئارمانجه‌كا دی ئه‌وه كو كه‌رتێ ئابووری و گه‌شتوگۆزاری ڤه‌وژینیت ژبه‌ركو هژماره‌كا زۆر یا سینه‌ماكار و وه‌لاتیان كوم دبن و تێكه‌لیێن زۆر دروست دبن.
زێده‌تر گۆت، دهوك وه‌كو باژێره‌كێ بچوك كارڤه‌دانێن مه‌زن ل ئاستێ جیهانێ د وارێ سینه‌مایی دا دروستكریه، ئه‌گه‌را سه‌ره‌كی یا گیروبوونا فلمه ڤێستیڤالا دهۆك یا نیڤده‌وله‌تی دزڤریت بۆ به‌لاڤبوونا كۆرۆنایێ، له‌وا مه خواست كو رێنمایێن حوكمه‌تا هه‌رێما كوردستانێ بجه بكه‌ین و خه‌لكی ژی هان بده‌ین كو گیانێ وان سلامه‌ت بیت، دیسان ژێوارێ كوردستان و عیراقێ و هه‌لبژارتنێن چریا ئێكێ یا ئه‌ڤ ساله ژی ئێك بوو ژ ئه‌گه‌ره‌كێ كو ڤێستیڤال گیرو بیت، ئه‌م سوپاسیا هه‌موو وان كه‌سان دكه‌ین كو بزاڤ كری ڤێستیڤال به‌رده‌وام بیت و ئومێدا مه ئه‌وه بشێن ڤێستیڤالێ ب سه‌ركه‌فتیانه ئه‌نجام بده‌ین، دیسان پرۆژه‌كێ گرنگ بناڤێ نوهات كو دێ گرنگی ب شیانێن وان كه‌سان ده‌ت یێن بخوازن فلمان و كارێن هونه‌ری ئه‌نجام بده‌ن، تێدا دهێنه فێركرن و پێگه‌هاندن و راهێنان دا ب تایبه‌تی ب رێیا ورگ شوپا و دێ نێزیكێ 30 كه‌سان فێركه‌ن كو بشێن كارێن جوان بكه‌ن و كارێن وان ببن به‌رهه‌م بۆ فلمه ڤێستیڤالا دهۆك یا نیڤده‌وله‌تی ل گه‌رێن بهێت دا.
نێزیكێ هزار فلم گه‌هشتینه فلمه ڤێستیڤالا دهۆك یا نیڤده‌وله‌تی و نێزیكێ 600 فلم هاتینه دیتن، نێزیكێ 60 فلم یێن بیانی هاتینه ده‌ستنیشانكرن، دیسان هنده‌ك فلمێن هه‌ری گرنگ ل جیهانێ هاتینه ده‌ستنیشانكرن كو ژلایێ ده‌رهێنه‌رێن بیانی ل كوردستانێ و دهۆكێ هاتینه چێكرن، دیسان وه‌لاتێ ئه‌ڤغانستانێ ئێكه ژ مژار و فوكسێن ڤێستیڤالێ، سێ فلم هاتینه ده‌ستنیشانكرن بۆ ده‌ستپێكا فلمه ڤێستیڤالا دهۆك یا نیڤده‌وله‌تی، حه‌فتیا داهاتی ئه‌ڤ یه‌ك دێ ئێكلا بیت.
هه‌ر ئێك ژ فلمێن بێخاك، خاكێ پیس، دانسا عه‌لی و زینێ، پاراستنا برایی، زالاڤا، كوچبه‌رێ بچوك، سه‌دیق و پلنگ وه‌كوفلمێن دریژ پشكدارن، دیسان بلگه فلم ژی هه‌ر ئێك ژ فلمێن نانێ پیروز، كیسه‌له، حه‌سه‌ن كێف، چیچكێن كوچبه‌ر، جاسمێ جه‌لیل، سیپانو بخوڤه دگرن، دیسان كورته فلم ژی هه‌ر ئێك ژ فلمێن حه‌فت سه‌نفونی، ئه‌ڤێ دی، ئایشا، شینتل، ژوور، ده‌نگێ دناڤ دوماهیێ، پشتی بارانێ بخوڤه دكرن.