دوای راگەیاندنی ئەنجامی بەرایی هەڵبژاردنی پێشوەختەی پەرلەمانی عێراق لە لایەن كۆمسیۆنی باڵای سەربەخۆی هەڵبژاردنەكان، كە دوێنێ بەڕێوە چوو، سەدرییەكان سەركەوتنێكی گەورە و میلیشیاكان شكستێكی گەورەیان بەدەست هێنا، سەدر لە گوتاری راگەیاندنی سەركەوتندا ئەو رۆژەی بە رۆژی گەل و سەركەوتن بەسەر میلیشیاكان لەقەڵەم دا.
سەدر لە وتارێكی تەلەڤزیۆنیدا رای گەیاند، سوپاس بۆ خوا كە فراكسیۆنی گەورەی چاكسازی سەرخست، فراكسیۆنی نە رۆژهەڵاتی و نە رۆژئاوایی، ئەمڕۆ رۆژی گەل و هێزە تەناهییەكانە، رۆژی سەركەوتنی ستملێكراو بەسەر ستەمكار، رۆژی خۆراگری و سەركەوتنە بەسەر میلیشیاكاندا.
پێویستە چەك بە دەستی دەوڵەتەوە بێ و نابێت لە دەرەوەی ئەو چوارچێوەیە بەكار بێت
زیاتر گوتی، لەبری دابەشكردنی كێك و بەرژەوەندییەكان، با بەرەو نووسراوی چاكسازی بچین، چونكە چاكسازی بووە هۆی دروستبوونی فراكسیۆنی گەورە، بۆیە بۆ لەمەودوا شوێنی گەندەڵی و گەندەڵكار نابێتەوە.
دووپاتی كردەوە كە پێویستە چەك بە دەستی دەوڵەت بێت و نابێت لە دەرەوەی ئەو چوارچێوەیە بەكار بێت، تەنانەت لەلایەن ئەوانەیشی بانگەشەی بەرگریكاری دەكەن و ئەوانەیشی هاوشێوەی ئەوانن، كاتی ئەوە هاتووە گەل دوور لەو میلیشیایانە بە ئاشتی بژیت.
سەدر باڵوێزخانەكانی لەوە دڵنیا كردەوە كە هەموویان پێشوازی لێ كراون، تا ئەوكاتەی دەست لە كاروباری ناوخۆی عێراق و پێكهێنانی حكوومەت وەرنادەن، داوایشی لە لایەنگرانی كرد بێ بێزاركردنی كەس ئاهەنگی سەركەوتن بگێڕن.
سەدر دووپاتی لەوەیش كردەوە كە لێپرسینەوە لە هەر گەندەڵكارێك دەكەن هەركێیەك بێت، گەندەڵی رادەماڵن و لەسەر ئەو رێگەیەیش لا نادەن و كاریش بۆ بەرزكردنەوەی بەهای دیناری عێراقی دەكەن.
ئەو قسانەی سەدر دوای راگەیاندنی ئەنجامە بەراییەكانی زۆرینەی لیستە بەشدارەكانی عێراق لە هەڵبژاردنی پێشوەختە هات، كە كێبەركێیان لەسەر 329 كورسی پەرلەمان دەكرد و لیستەكەی سەدر توانی تا ئێستە 73 كورسی مسۆگەر بكات.