رێڤەبەریا شینوارێن دهۆکێ هەڤکاری ل گەل زانکۆییەکا نیڤدەولەتی و ئالیێن شولەژێ ل هەرێما کوردستانێ کارێ ڤەکولینێ ل شینوارەکێ نوو ل دهۆکێ دوماهی هات.
د. بێکەس بریفکانی، رێڤەبەرێ شینوارێن دهۆکێ بۆ "وشە" گوت، نووترین ڤەکولینا مە ب هەڤکاری ل گەل زانکۆیەکا نیڤدولەتی ل ناوەدارییا فەیدیێ یا سەر ب دەڤەردارییا سێمێلێ ب دوماهی هات.
ل سەر جویا فەیدیێ کو ب درێژاهیا 9کم هاتیە دروست کرن
زێدەتر گوت، کارێ نوو چەند نەخشێن نکراندی بوون کو هاتینە نکراندن ل سەر جویا فەیدیێ کو ب درێژاهیا 9کم هاتیە دروست کرن ل لێڤا چیایێ دەکا ل فەیدیێ و هژمارا نەخشێن نکراندی ژی 12 نەخشن و ل سەر بەرێ چیایی هاتینە نکراندن و ل سەر وان ژی وێنە ل سەر هەر نەخشەکی هەنە کو پێکدهێن ژ دوو پاشا و حەفت خوداوەندان کو ئەو ژی پاشا سەنحاریب و کوری وی ئیسرحدون و خوداوەند ژی بناڤێن خوداوەند عەشتار، ئەدەد، شەمەش، نابو، سین، مولیسو و ئاشور، هەر خوداوەندەک ل سەر پشتا ئاژەلەکی راوەستایە.
رێڤەبەرێ شینوارێن دهۆکێ دیارکر ژی کو دیروک و شارستانیا وان نەخشەیان و جویێ بو سەردەمێ پاشا سەرجونێ دوویێ بۆ سالا 722-705 پ.ز و کورێ وی پاشا سەنحاریب ل سالا 705-681 پ.ز دزڤریت و گوت ژی، مەرەم ژ دروستکرنا جویێ دزڤریت بۆ پروژەکێ ئاڤدێریێ و سود وەرگرتن بو مەرەما چاندنێ، هەبوونا ڤان هەموو خوداوەندان ژی گرنگی یا پروژەی دیار دکەت، داکو بهیتە پاراسین و پروژە هەر بمینیت، د نوکە دا رێڤەبەریا مە پەرجان ل دەردورێن ڤی شینواری کریە و ل ئایندە کار دێ یێ بەردەوام بیت و ئێکە ژ جهێن شوینواری یێن گرنگ ل کوردستان و عیراق و پارێزگەها دهۆکێ.