ب گوره‌ى بریارا وه‌زاره‌تا ڤه‌گوهاستنێ یا حوكمه‌تا هه‌رێما كوردستانێ رۆژا 1/8/2021ێ ژڤانێ لێدانا شریت و لوگویێن ته‌كسیان دوماهى هاتیه، به‌لێ كاركرنا وان به‌رده‌وامه و هه‌تا نوكه نێزیكێ 30% هاتینه لوگوكرن، رێڤه‌به‌رێ ڤه‌گوهاستنا دهۆكێ ژی دیاركر كو پێدڤى یه شوفێر ب زوترین ده‌م سه‌ره‌دانا رێڤه‌به‌ریێ بكه نبۆ لوگوكرنا ته‌كسێن خوه.
خوشبى عوسمان، رێڤه‌به‌رێ ڤه‌گوهاستنا دهۆكێ بۆ "وشه" دیاركر كو بریاربوو رۆژا 1/8/2021ێ كارێ شریت و لوگوكرنا ته‌كسیان بهێته راگرتن و گۆت، هه‌تا نوكه نێزیكێ چوار هزار ته‌كسیى ل سنورێ رێڤه‌به‌ریا مه هاتینه توماركرن كود بیته رێژا نێزیكێ 30% ژ كوما وان ته‌كسیێن ل پارێزگه‌ها دهۆكێ هه‌یى، نوكه كاركرنا مه ل سه‌ر شریت و لوگوكرنا ته‌كسیان به‌رده‌وامه و رۆژانه دناڤبه‌را 100 بۆ 120 ته‌كسیان دهێنه لوگوكرن.
زێده‌تر گۆت، ب گوره‌ى په‌یچێ وه‌زاره‌تا ڤه‌گوهاستنێ ده‌مێ شریت و لوگوكرنا ته‌كسیان بۆس ێ هه‌یڤان هاتیه درێژكرن، به‌لێ هه‌تا نوكه چوو بریار و نڤیسار بۆمه نه‌هاتینه، ئه‌گه‌ر ده‌م هاته زێده‌كرن پێدڤى یه شوفێر ب زوترین ده‌م قه‌ستا رێڤه‌به‌ریا مه بكه‌ت بۆ توماركرنا ته‌كسێن خوه، داكو تووشى چوو به‌رپرسیاره‌تیێن قانونى نه‌بن).
ناڤبرى دیاركر ژی كو هه‌ر شوفێره‌كێ ته‌كسیان دده‌ما دیاركرى دا ته‌كسیا خوه لوگو نه‌كر دێ هێته سزادان و گۆت ژی، شوفێر دێ ژلایێ رێڤه‌به‌ریا هاتن و چونێ هێته سزادان كو ئه‌و ژی گرتنا ترومبێلا وى یه هه‌تاكو شریت و لوگو دكه‌ت، ئه‌گه‌ر دووباره بو ودێ ب كوژمێ 500 هزار دیناران هێته سزادان، مه‌ره‌م ژ لوگوكرنا ته‌كسیان ژی بۆ هندێ یه كو جوداهى د كارێ ته‌كسیان دناڤبه‌را پارێزگه‌هان و وان ته‌كسیان ژی بهێته‌كرن ئه‌وێن دناڤا پارێزگه‌هان و ده‌رڤه‌یێ پارێزگه‌هان كار دكه‌ن، ئه‌ڤه زێده‌بارى وێ یه‌كێ كو ژروویێ ئه‌من و ئاسایشێ ڤه زێده‌تر كونترولا وان دهێته‌كرن و هه‌ر كه‌سێ تشته‌كێ خوه ژی به‌رزه بكه تدێ زوتر هێته دیتن.
ئه‌و شوفێرێن كو د سرا شریت و لوگوكرنا ته‌كسێن خوه دابوون گله‌یێن زۆر ل جهێن شوله‌ژێ دكرن كو پێرابوونێن وان زۆرن و چه‌ندین رۆژان پێڤه دمینن هه‌تاكو بشێن تومار بكه‌ن.
شوفێره‌كێ ته‌كسیێ كو ل زاخۆ هاتبویه رێڤه‌به‌ریا ڤه‌گوهاستنێ و نه‌ڤیا ناڤێ خوه بێژیت بۆ "وشه" گۆت، پێدڤى بوو مه هه‌ر ل زاخۆ دروستكربایه ژبه‌ركو ئه‌م نه‌شێن بۆ چه‌ندین جاران هاتن و چونێ دناڤبه‌را زاخۆ و دهۆكێ بكه‌ین، هه‌تاكو ئه‌م مامه‌له‌یێن خوه داوى بینین 10 جهان دچینێ كو ئه‌ڤ یه‌ك ژی ده‌مه‌كێ زۆره و هه‌موو جهان ژی ره‌نگه سرا بیت، ئه‌ڤه زێده‌بارى كو مه‌سره‌فه، كارێ مه‌یێ ته‌كسیى َوه‌كو كارێ خازخازوكان لێ هاتیه، له‌وا دبیت بارێ مه بهێته سڤكرن.
سه‌یفوللا عه‌لى ژی شوفێره‌كێ یه و مامه‌لێن ته‌كسیا خوه دروست دكرن بۆ "وشه" گۆت، وه‌كو پێدڤى ئاسانكارى بۆ مه نه‌هاتینه‌كرن له‌وا هه‌تا نوكه مه‌ژى گیركر، به‌لێ ئه‌ڤرۆ ئه‌ز هاتیمه بۆ لێدانا شه‌ریت و لوگویان، هه‌ر چه‌نده ئاسته‌نگێن زۆر هه‌نه و پێدڤى نه‌بوو هنده‌ك ژبه‌ر شوفێرا گرانكرى، به‌لێ ل گه‌ل ڤێ یه‌كێ ژی ب تشته‌كێ باش دبینم ئه‌گه‌ر ئاسانكارى بۆ شوفێرا بهێنه‌كرن كو بدانن، دیسان دڤێت ئه‌ڤ یه‌ك جوداهیه‌كێ بێخیته كارێ شوفێریا ته‌كسیێ و هه‌ر لوگو نه‌بیت و هه‌موو ئه‌و كه‌سێن نه شوفێرن بهێنه دورخستن ژ كارێ ته‌كسیێ ژبه‌ركو كار زور كێمه و كارتێكرنێ ل سه‌ر كارێ مه دكه‌ن.