ب مەرەما خزمەتکرنا زێدەتر یا ناساندنا پارێزگەها دهۆکێ،53 سالی و هەشتەمین کەرنەڤالا پارێزگەهبونا دهۆکێ ب چەندین چالاکیێن هونەری و جودا هێتە ساخکرن.
حەسەن فەتاح، پەیڤدارێ رێڤەبەریا گشتی یا رەوشەنبیری و هونەری ل پارێزگەها دهۆکێ بۆ "وشە" گوت، ل ژێر درۆشمێ کەرنەڤال بۆ خزمەتا خەلکی، رێڤەبەرییا گشتی یا رەوشەنبیری و هونەری ل پارێزگەها دهۆکێ، ب پشتەڤانیا پارێزگارێ دهۆکێ دێ هەشتەمین کەرنەڤالی ب هەلکەفتا 53 سالیا پارێزگەهبوونا دهۆکێ گێریت.
کەرنەڤال دێ هەمەرەنگی و پێکڤە ژیانا دهۆکێ هەمبێز دکەت
زیدەتر گوت، کەرنەڤال دێ هەمەرەنگی و پێکڤە ژیانا دهۆکێ هەمبێز دکەت، تێدا کومەکا چالاکیێن هونەری و جوراوجورێن وەکو بەریکانێن ماراسۆنی و جل وبرگێن فلکلۆری یێن کوردی، نیشاندانا بەرهەم و پرۆژەیێن رێڤەبەریێن حکومەتێ، برگەیێن کەلتووری، هونەری، کونسێرتا ستران و مۆزیکێ، دێ هێنە نیشاندان.
ناڤبری دیارکر ژی کو کەرنەڤالێ 53 سالیا پارێزگەهبوونا دهۆکێ دێ ل رۆژا ئەینی 27ی گولانا 2022ێ هێتە گێران و سەنتەرێ کەرنەڤالێ دێ ل پارکا نەورۆز بیت و گوت ژی، کەرنەڤال ب بەریکانێن ماراسۆنێ دێ ل دەمژمێر 5ی ئێڤاری دەستپێکەت و ل دەمژمێر 8ی شەڤێ ژی کونسێرتا ستران و مۆزیکێ دێ هێتەگێران، داخوازێ ل هەموو لایەکێ دکەین کو پشکدار و هاریکاربن بۆ سەرخستنا کەرنەڤالێ و نیشاندانا روویێ جوان و گەشتیاری و هونەری و پێکڤەژیانێ ل پارێزگەها دهۆکێ.