ئەلزەهایمەر، جۆرێكە لە خەڵەفان، كار دەكاتە سەر بیرهاتنەوە و بیركردنەوە و مێشكی مرۆڤ، بە هەنگاو دەست پێ دەكات تا دەگاتە حاڵەتێكی توند كە ژیانی رۆژانە پەك دەخات، رەنگە وا بزانرێت نەخۆشی پیرەكانە، راستییەكەی پێوەست نییە بە تەمەن و دەكرێت وەك ئەلزەهایمەری پێشوەخت ببێتە مێوانی هەر كەسێك، بەڵام چۆن دەزانی تۆ یەكێكیت لەوانەی ئەگەری تووشبوونت هەیە؟
هۆكاری 60 بۆ 80%ی حاڵەتەكانی خەڵەفانە
ئەلزەهایمەر هۆكاری 60 بۆ 80%ی حاڵەتەكانی خەڵەفانە، دەستەواژەیەكە مانای لەدەستدانی یادەوەری و تواناكانی مێشك دەگەیەنێت، بەپێی كات پەرە دەستێنێت، بەڵام سەرەتاكانی بە لەدەستدانی یادەوەری سووك دەست پێ دەكات و لە كۆتاییەكەیش ئەو كەسە توانای قسە و دایەلۆگی لەگەڵ كەسانیتر و كارلێككردن لەگەڵ ژینگەكەی لەدەست دەدات، ئەوان چوار بۆ هەشت ساڵ لەدوای دەستنیشانكردنی حاڵەتەكە دەژین، هەندێك جاریش دەگاتە 20 ساڵ.
لە نیشانەكانی ئەلزەهایمەری زوو:
*لەبیركردنی شتە گرنگەكان، بەتایبەتی زانیارییە نوێ و مێژووە گرنگەكان.
*داواكردنی هەمان زانیاری بۆ چەندجارێك.
*بوونی كێشە لە چارەسەركردنی كێشە سەرەكییەكان.
*لەبیركردنی كات و مێژوو.
*نەزانینی شوێنەكەت و چۆن گەیشتوویتە ئەوێ.
*كێشە لە تێگەیشتنی شتەكان و بینیان.
*كێشە لە چوونە ناو گفتوگۆكان یان دۆزینەوەی وشەی گونجاو بۆ قسەكردن.
*دانانی شتەكان لە شوێنی هەڵە و بێتوانایی لە دۆزینەوەیان.
*پاشەكشەكردن لە كار و چالاكییە كۆمەڵایەتییەكان.
*گۆڕانكاری لە میزاج و كەسایەتی.