بەهۆی پشتگیری بەڕێوەبەری گشتی رۆشنبیری و هونەری سریانی حكوومەتی هەرێمی كوردستان لە ناوچەی حەمدانیە و دەشتی نەینەوا، پەیمانگای هونەرە جوانەكانی حەمدانیە لە بەغدیدای سنووری دەشتی نەینەوا رێزیان لە بەڕێوەبەری گشتی رۆشنبیری و هونەری سریانی لە هەرێمی كوردستان "كلدۆ رەمزی ئۆغنا" گرت بۆ رۆلی لە پشتیوانكردنی چالاكییە هونەرییەكانی لاوان و رۆشنبیری سریانی لە ناوچەكەدا.
ئەمڕۆ پێنجشەم دووی ئایاری 2024، لە دووەمین فیستڤاڵی ساڵانەی پەیمانگای هونەرە جوانەكانی حەمدانیە لە بەغدیدا كە لە رۆژانی (2 و 3)ی ئایار بەڕێوە دەچێت و چەندین چالاكی هونەری لە خۆ گرتبوو، بە ئامادەبوونی "مار بندكتۆس یونان حەنوو" سەرۆكی كلێسای كاسۆلیكی سریان لە مووسڵ و دەوروبەری و " رافد یوسف" بەڕێوەبەری پەروەردەی حەمدانیە لە پارێزگای نەینەوا ریز لە بەڕێوەبەری گشتی رۆشنبیری و هونەری سریانی لە حكوومەتی هەرێم گیرا.
بەڕێوەبەری گشتی رۆشنبیری و هونەری سریانی لە حكوومەتی هەرێم بەڵێنی پشتگیری بەردەوامی حكوومەتی هەرێمی بۆ هونەرمەندانی لاوی دەشتی نەینەوا دووپات كردەوە.