میسی بۆ یاریی كلاسیكۆی سبەی پەیامێك بڵاو دەكاتەوە
لیۆنێل میسی ئەستێرەی یانەی بەرشەلۆنە هیوابڕ نەبووە بەرامبەر شكستە گەورەكەی پێرێ یەكشەم لە یاریی چوونی جامی سوپەری ئیسپانیا بەرامبەر یانەی ریال مەدرید لەنێو یاریگەی كامپ نوو بە ئەنجامی 1-3 گۆڵ.
میسی لە پەیامێكدا لەسەر تۆڕی كۆمەڵایەتی (ئینستگرام) ئاماژەی بەوەداوە كە یانەی بەرشەلۆنە دەتوانێ سبەی قەرەبووی شكستەكە بكاتەوە و لەنێو یاریگەی سانتیاگۆ بێرنابیۆ سەركەوتنێكی گەورە بەدەست بێنێ.
میسی لە پەیامەكەدا نووسیویەتی "رۆژی شكستەكەمان قورس بوو، بەڵام دەتوانین دووبارە هەستینەوە و بەردەوام بین، لە ئێستاشەوە دەستمان پێ كردووە".
میسی لەگەڵ پەیامەكەیدا 3 وێنەی مەشق و راهێنانەكانی یاریزانانی یانەی بەرشەلۆنەی لەنێو یاریگەی خوان گامبەر بڵاو كردووەتەوە.
لای خۆیەوە رۆژنامەی (مۆندۆ دیپۆرتیڤۆ)ی كەتەلۆنی بڵاوی كردەوە: میسی ئاواتەخوازە سبەی یەكشەم رۆژێكی مێژوویی لە یارییەكانی كلاسیكۆدا تۆمار بكات و سەركەوتنێكی گەورە بەسەر یانەی ریال مەدرید لەنێو یاریگەی سانتیاگۆ بێرنابیۆدا بەدەست بێنن.
جێی باسە میسی لە یارییەكەی پێرێ یەكشەمدا ئاستێكی باشی پێشكەش كردبوو و تاكە گۆڵی یانەكەشی لە رێگەی لێدانی سزاوە تۆمار كردبوو، بەڵام نەیتوانیبوو ئامانجی سەرەكی یانەكەی بەدەست بێنێ كە سەركەوتن بوو.
وشە -
ئامانج ئهكرهم