مه‌سروور بارزانی: ڕیفراندۆم تاكه‌ بژارده‌ بوو بۆ ئه‌وه‌ی كێشه‌كانمان له‌گه‌ڵ به‌غدا چاره‌سه‌ر بكه‌ین

راوێژکاری ئه‌نجوومه‌نی ئاسایشی هەرێمی کوردستان، ڕای ده‌گه‌یه‌نێ، هه‌رێمی كوردستان وه‌ك تاكه‌ بژارده‌یه‌ك بۆ چاره‌سه‌ركردنی كێشه‌كانی له‌گه‌ڵ به‌غدا، ڕێگه‌ی ڕیفراندۆمی گرتووه‌ته‌ به‌ر، به‌لاشمانه‌وه‌ سه‌رسووڕمان بوو كاتێك ئه‌و هه‌ڵوێسته‌ دژانه‌مان بینی.

مەسرور بارزانی راوێژکاری ئه‌نجوومه‌نی ئاسایشی هەرێمی کوردستان، لە چاوپێکەوتنێکدا لەگەڵ بەرنامەی "هاردتۆک"ی کەناڵی BBCی بەریتانی، ئاماژەی بۆ ئەوە کرد هەڵوێستی ئەمەریکا و کۆمەڵگەی نێودەوڵەتی لە پاڵپشتییكردنى حکوومەتی عێراق، ئەو پەرچەکردارەی عێراق و دراوسێکانی لێ کەوتەوە، له‌ كاتێكدا هەرێمی کوردستان، هیچ نیازێکی دوژمنکارانەمان بەرامبەر بە دراوسێکان نییە.

هه‌روه‌ها ده‌ڵێ، خواستی سەربەخۆیی، خواستێکی لە مێژینە و ڕەوای گەلی کوردە و بڕیاری رێفراندۆمیش بڕیاری هەموو هاووڵاتییانی کوردستان بووە. ئامادەیی هەرێمی کوردستانیشی بۆ گفتوگۆ لەگەڵ بەغدا دەربڕی بۆ چارەسەرکردنی کێشەکان.

مەسرور بارزانی لەمبارەیەوە گوتی: پێشتر و دوای ریفراندۆمیش داوای گفتوگۆمان لەگەڵ بەغدا کردووە لە پێناو چارەسەریی کێشەکان. راوێژکاری ئه‌نجوومه‌نی ئاسایشی هەرێمی کوردستان روونیشیکردەوە کە حکوومەتی عێراق بە هۆی پێشێلکردنی پەنجاوپێنج ماددەی دەستوور، خەڵکی کوردستانی بەرەو ریفراندۆم هاندا.

ئەمەش دەقی چاوپێکەوتنەکەیە:

شۆن لەی: سڵاو بەخێربێن بۆ بەرنامەی ھارد تۆک. حەفتا ساڵ لەمەوبەر سەرکردەیەک بە ناوی بارزانی سەربەخۆییی کوردستانی راگه‌یاند، به‌ڵام پشتگوێ خرا. مانگی رابردوو کوڕەکەی ریفراندۆمێکی ئەنجام دا بۆ بەدەستھێنانی سەربەخۆیی. بەغدا رای گەیاند لە جیاتی ریفراندۆم یاساکانی خۆی دەسەپێنێت. مەسرور بارزانی کورەزای مستەفا بارزانی و کوری گەورەی مەسعود بارزانی میوانی بەرنامەکەمە.

راوێژکاری ئەنجومەی ئاسایشی ھەرێمی کوردستان، کە رۆڵێکی کاریگەری ھەبووە لە شەڕی دژ بە داعش، پێیوایە کە کورد مافی خۆیەتی دەوڵەتی سەربەخۆی ھەبێت. بەڵام لەگەڵ دژایەتیەکانی عێراق، ئێران و تورکیا و بەشێکی زۆری کۆمەڵگەی نێودەوڵەتی، ئایا ئەم ریفراندۆمە بەوە کۆتایی دێت کە ئەو ئۆتۆنۆمیەی کە ئێستا ش ھەیانە  بۆیان بمێنێتەوە؟

مەسروور بارزانی: وەک دەزانی ماوەیەکی دوور و درێژە ئێمە لەگەڵ بەغدا کێشەمان ھەیە، و ھەموو رێگەیەکمان گرتووەتەبەر بۆئەوەی ئەو کێشانە بە رێگەی ئاشتیانە چارەسەر بکەین. بەڵام بەداخەوە حکوومەتی عێراق بە گوێرەی دەستور مامەڵەی لەگەڵ ئەو بابەتانەدا نەکردووە و ئێمەی وەک ھاوبەشی راستەقینە پەسەند نەکرد وەک ئەوەی کە لەسەری رێککەوتبووین کە بەشێک بین لە عێراق. دوای گرتنەبەری ھەموو رێگەکانی دیکە ئێتر ھیچ بژاردەیەکمان بۆ نەمایەوە تەنیا ئەوە نەبێت کە رێگەی رێفراندۆم بگرینەبەر وەک پرۆسەیەکی دیموکراسی و وەک ئامرازێکی ئاشتیانە بۆ دەربڕینی خواستی خەڵکی خۆمان بۆ داھاتووی پەیوەندییەکانمان لەگەڵ بەغدا‪.

مەسرور بارزانی: لە راستیدا خواستی سەربەخۆیی کوردستان دەگەڕێتەوە بۆ نزیکە سەدەیەک لەمەوبەر. بەڵام بەداخەوە بەدرێژایی ئەو ماوەیە بەشێوەیکی نادادپەروەرانە مامەڵەمان لەگەڵدا کراوە. بەڵام ئێمە پێموانیە ئۆتۆنۆمی بەس بێت بۆ پاراستنی مافەکانمان، وەک لە رابردوودا بینیومانە کە رووبەڕووی ھەڕەشە و ھێرش بووینەتەوە، جینۆسایدکراوین و کیمیاباران کراوین و ئەنفال کراوین. پێویستمان بە دڵنیاییەکی نێودەوڵەتی ھەیە کە لە داھاتوو ئەم تاوانانەی بەرامبەرمان کراون دووبارە نەبنەوە‪.

مەسروور بارزانی: حکوومەتی ئێستا لە 2003 ەوە دروست بووە لەگەڵ رووخانی رژێمی پێشوو، ھیوامان خواست کە لەگەڵ ئەم حکوومەتە نوێیە سەردەمێکی نوێ بێتە ئاراوە و دەسەڵاتەکان بەشێوەیەکی دادپەروەرانە دابەش بکرێن. ئێمەش بەشێوەیەکی خۆبەخشانە وئارەزوومەندانە چووینەوە بەغدا و بەشداریمان کرد لە دروستکردنی وڵاتێک کە پێی بوترێ وڵاتی ھەموومان. دەستورمان پەسەند کرد و پێمانوابوو کە ئەم دەستوورە بە تەواوی جێبەجێ دەکرێت. بەڵام وەک ئاشکرایە بۆ ھەموولایەک ئەم دەستورە بە تەواوی جێبەجێ نەکرا و حکوومەتەکانی بەغدا بە دیاریکراوی ئەو مادانەیان جێبەجێ دەکرد کە خزمەتی ئەجێندای خۆیان دەکرد. ئەوەی کە بەشێک بوو لەو پاکێجەی کە داوای کورد بوو پشتگوێ خرا. ئێمە زۆر ھەوڵماندا کە دڵنیابینەوە کە دەتوانین کێشەکانمان بەشێوەیکی ئاشتیانە چارەسەر بکەین بەڵام نەکرا. بەڵێ، راستە رژێمی بەغدا گۆراوە بەڵام بەداخەوە بینیمان ئەو عەقڵیەتەی بەغدا بەرێوە دەبات لە بنەماکانی دیموکراسی دوور دەکەێتەوە و دوور دەکەوێتە لە دابەشکردنی دەسەڵاتەکان و بەرەو رژێمێکی تاکلایەنە ھەنگاو دەنێت. بەشێوەیەک کە نەک تەنھا کورد پەراوێز دەخات بەڵکو سوننەکانیش پەراوێز دەخات. ئەمە جێگەی نیگەرانی ئێمە بوو. بۆیە ئێمە زۆر نیگەرانین لە داھاتووی گەلەکەمان ئەگەر جۆرێک لە پاراستنی نێودەوڵەتیمان نەبێت‪.

مەسروور بارزانی: ئێمە دەستورمان پەسەند کرد، ھەموو دەستورەکەمان پەسەند کردووە نەوەکو تەنیا ھەندێک لەو مادانەی کە بەغدا ھەڵیاندەبژێرێ لەپێناو خزمەتکردن بە بەرژەوەندییەکانی خۆی. لە راستیدا ئەگەر سەیری دەستور بکەی یەکێک لەو ھۆکارانەی کە ئێمە ریفراندۆمان ھەڵبژارد ئەوەیە کە دەستور پێشێلکراوە، لە راستیدا 55 ماددەی دەستور پێشێلکراون، ئەمەش 55 بەڵگە و پاساوی داوەتە دەستی ئێمە بۆئەوەی ئێمە ئەم ریفراندۆمە ئەنجام بدەین. 

مەسروور بارزانی: بەتەواوی وەک ئەوەی کە خۆت وتت و دەزانی ئێمە لە چ ژینگەێکدا دەژین و چەندە خراوینەتە بەر ھەڕەشەی بریارەکانی وڵاتانی دراوسێمان. با من لەوەوە دەست پێ بکەم کە بڵێم ئەگەر دەرفەتم بدەی روونی بکەمەوە، ئێمە ریفراندۆمان لە کوردستانی عێراق ئەنجامداوە. ئەمە یەکێکە لە دیموکراسیترین  و ئاشتیانەترین ئامراز بۆ دەربرینی خواستی خۆمان. ئێمە لە سەدەی 21 دەژین و زۆر جێگای نیگەرانیە کە ئێمە ھێشتا لەبەرامبەر دەربڕینی خۆمان دژایەتیمان دەکرێت. ئەوەی ئێمە کردوومانە بۆ ئەوەیە بە بەغدا بڵێین کە خەڵکی ئێمە چی دەوێت. ئەوە بەغدا بوو کە پاڵی بە ئێمە نا کە ریفراندۆم ئەنجام بدەین بەوەی کە بەناراستەوخۆ بە ئێمەی دەوت کە ئێوە نوێنەرایەتی ھەموو گەلی کورد ناکەن و لایەنە کوردییەکان دابەشبوون. لە راستیدا ئەم ھۆکارانە پاڵپشتێکی یاساییە بۆئەوەی دەست بە گفتوگۆ بکەین لەگەڵ بەغدا چونکە ئێمە ھێشتا دەستبەجێ و دوای ریفرانۆدم سەربەخۆییمان رانەگەیاندوە،، تەنیا خواستی خۆمان ئاشکرا کردووە سەبارەت بە داھاتووی خۆمان لەگەڵ بەغدا‪.

مەسروور بارزانی: بەر لەهەموو شتێک ئەوە پرسێکی عیراقییە و دراوسێیکانی عێراق هەق نییە دەستوەردان بکەن، کۆمەڵگەی نێودەولەتیش هەق نییە رێگە بەدەستوەردانی دراوسێکان لە نێوخۆی وڵاتێکدا بکەن. خاڵێکی تر کە ئاماژەت بۆکرد بەڵێ خەڵک دەنگی بۆ سەربەخۆیی دا و ئەمەش مافێکە لە جاڕنامەی نەتەوە یەکگرتووەکاندا هاتووە کەواتە هیچ هەڵەیەک لەوەدا نییە کە خەلکی بڕیار لە شێوەی ژیانی خۆی لە ناو وڵاتەکەی بدات. 93٪ دەنگی لە ریفراندۆم بە بەڵێ دا بۆ سەربەخۆیی بەڵام ئێمە سەربەخۆییمان رانەگەیاندووە. پێش ریفراندۆدم و دوای ریفراندۆمیش گوتوومانە  کە دەمانەوێ رێپێدانێکی یاساییمان هەبێت بۆ گفتوگۆی لەگەڵ بەغدا وچارەسەرکردنی ئاشتیانەی کێشەکان.

لەبارەی ئەو ناوچانەی تۆ ئاماژەت پێدان کە ئێستا لە دەرەوەی ناوچەکانی حکوومەتی هەرێمی کوردستانن. نابێ لەبیرمان بچێت کورد بە شێوەیەکی سیستەماتیکی لە لایەن رژێمەکانی پێشووی عێراقەوە دەرکراون و خەڵکی تریان بۆ هێنراون .  

دووبارە کۆنترۆڵکردنەوەی ئەم ناوچانە، لەڕاستیدا پێوەندی بە سەرهەڵدانی داعشەوە هەیە. ئەوە داعش بوو کە هەڕەشەی بوو بۆ کوردستان و داعش بوو کە بەشێک لە عێراقی داگیر کرد، شکستی حکوومەتی عێراق لە لە پارێزگاریکردن لە خەڵکی ئەم ناوچانە پێشمەرگەی ناچار کرد بچێت  پارێزگاری لەم ناوچانە بکات بۆئەوەی نەکەونە دەست داعش. ئەگەرنا ئێستا هەمووان دەبووایە هەوڵیان دابووایە وەک ناوچەکانی تری بن دەستی داعش ئەوانیشیان رزگار بكردایه‌.  ریفراندۆمی ئێمە، لەڕاستیدا باسی لەوە نەکردووە کە چارەنووسی ئەم ناوچانەی پێ یەکلا بکرێتەوە و بۆ ئەوەش نییە تا سنوورەکانی کوردستان و عێراقی پێ دیاری بکرێت. ئێمە ئەو بابەتەمان بۆ دانوستان لەگەڵ بەغدا لەسەر بنەمای ماددەی 140ی دەستوور جێ هێشتبوو، کە حکوومەتی عێراق جێبەجێی نەکردووە.

مەسروور بارزانی: من نازانم چی لە بابەتەکە گۆڕاوە. لەوەتەی ساڵی 1991 ەوە کوردستان دەوڵەتێکی سەربەخۆی دیفاکتۆ بووە. بەڵام پاش ئەوەی دەستوور لە 2005 پەسەند کرا، هەندێک مافی تایبەت دران بە حکوومەتی عیراق. ‌حکوومەتی عێراقیش هەر هەموو ئەم مافانەی لەدژی هەرێمی کوردستان بەکار هێناوە.

مەسروور بارزانی: بەڵێ. ئێمە سەرمان سووڕماوە لەو هەموو کاردانەوە زۆرەی تورکیا و دراوسێیەکان و لەڕاستیدا لە کاردانەوەی حکوومەتی عێراقیش تێ ناگەین. ئێمە ریفراندۆممان نەکردووە تا کیشەکان ئاڵۆز بکەین.  ئێمە پێمان وایە، ریفراندۆم تاکە بژاردەی ئێمەیە بۆ چارەسەرکردنی کێشەکانمان لەگەڵ بەغدا بە شێوەیەکی گونجاو و بۆ پەنجەخستنە سەر هەر هەموو ئەو کێشانە کە راستەقینەن. ئێمە ناتوانین خۆمان هەڵبخەلەتێنین و بڵێین هیچ کێشەیەک نییە و هەموو شتێک ئاساییە. ئەوەی پاڵی بە ئێمەوە نا ریفراندۆم بکەین، ئەوەیە کە کۆمەڵیک کێشەمان لەگەڵ حکوومەت هەیە. ئێمە خوازیاری هیچ دوژمنایەتییەک نین نە لەگەڵ تورکیا، نە لەگەڵ ئێران و نە لەگەڵ عێراق. ئێمە زۆر سەرمان سووڕماوە لەو  رێکارە نەگونجاوانەی ئەوان لەدژی خەڵکی ئێمەیان گرتووەتە بەر.

مەسروور بارزانی: لەڕاستیدا ئێمە سەرمان لەوە سووڕ ماوە کە ئەوان رێز ناگرن لە ویستی سێ ملیۆن کەس بۆ دەربڕینی رای ئازادی خۆیان لەسەر ئەوەی چۆن لەم وڵاتە بژین. بەڵام ئێمە هەرگیز نەمانگوتووە کە ئێمە ویستی خۆمان لەسەر هیچ حکوومەتێک یان ولاتێک دەسەپێنین. لەڕاستیدا ئێمە دەرگای دانوستانمان بە کراوەیی هێشتووەتەوە بۆ گەیشتن بە چارەسەرێکی ئاشتیانە. بۆیە ئەگەر ئەوانی تر دەرگاکان بگرن و حەز نەکەن لەگەڵمان بە ئاشتییانە بدوێن بۆ گەیشتن بە چارەسەرێک، پێموایە ئەوان بەرپرسیار دەبن لە هەر دەرەنجامێک. 

مەسروور بارزانی: پێشمەرگە لە بەرەی پێشەوەی شەڕی داعش  وتێکشکاندنی ئەفسانەی داعش بوونە. لەکاتێکدا جیهان ستایشی پیشمەرگەی دەدا، جارێکی تر ئەوە حکوومەتی عێراق بوو کە رەخنەی لە دابینکردنی چەکی قورس بۆ پێشمەرگە دەکرد بۆئەوەی لەم شەڕەدا خێراتر بەسەر داعشدا زال بن و لە کاتێکدا بوو کە ئێمە پێویستمان بە پاڵپشتیی دارایی هەبوو کاتێک کە شەڕی دوژمنێکی هاوبەشمان دەکرد کەچی حکوومەتی عێراقی بوودجەی کوردستانی بڕی لە کاتێکدا ئێمە هەروەها 1.8 ملێۆن  ئاوارەکانی بەشەکانی تری عێراق وپەنابەری سوریمان  لە کوردستان لەخۆ گرتبوو. بۆیە هیواداربووین کە کۆمەڵگەی نێودەوڵەتی وبەتایبەتی حکوومەتی عێراق پشتیوانیمان دەکەن. پیشمەرگە ئەو هەموو کاتە ستایش دەکرا، بەڵام کە ئێستا دەمانەوێت بە ئازادانە و بە دیموکراسیانە داهاتووی پێوەندییەکانمان لەگەڵ بەغدا بنیات بنێین، جارێکی تر هێرشمان دەکرێتە سەر، لەکاتێکدا کۆمەڵگەی نیودەوڵەتی  زۆر بێ دەنگە و لە ڕاستیدا ئەم بێدەنگییە وای کردووە هەم بەغدا و هەم ولاتانی دراوسێ جورئەت بکەن، ئەم رێکارە تووندانە لەدژی خەلکی ئێمە بگرنە بەر.

مەسروور بارزانی: تۆ راست دەکەی. من ناڵێم ئەوان لەو رووەوە  بێدەنگبوون کە هەندێکیان لەڕاستیدا دژایەتیی ریفراندۆمیان کردووە، کە پرۆسەیەکی زۆر دیمۆکراسییە. بەواتایەکی تر ئەوان بەناراستەوخۆ پاڵپشتییان لە حکوومەتێکی تایفەگەری کردووە لەدژی پرۆسەیەکی دیموکراتی. ئێستاش بۆ شەڕی داعش ئێمە گوتومانە ئێمە خۆمان بۆ ئەم شەڕە تەرخان کردووە و پێمانوایە ئێمە ئەندامێکی چالاکی هاوپەیمانێتی دژی تیرۆر و داعشین و بەردەوامیش دەبین.

مەسروور بارزانی : نەخێر بە هیچ شێوەیەک،  ریفراندۆم هیچ پێوەندیی بە پابەندبوونی ئێمە بۆ شەڕی دژی داعش نییە. لەڕاستیدا ئێمە کە دەستمان بە شەڕی داعش کرد، پاڵنەرمان بۆ ئەم شەڕە و شکستپێهێنانی داعش پێوەندییەکانمان لەگەڵ بەغدا نەبوو بەڵکو بڕیاری خۆمان بوو، ئیرادەی گەلی خۆمان بوو. بۆیە تەنانەت لەم ساتەشدا ئێمە ئامادەین تا کۆتایی شەڕی تیرۆریزم بکەین و پێمانوایە پێوەندییە سیاسییەکانی نێوان بەغدا و هەولێر هیچ کاریگەریی خراپی لەسەر شەڕ نابێت. ئێمە ئەوەمان بۆ هاوپەیمانان و بۆ بەغداش روون کردووەتەوە و ئێمە ویستی خۆمان بۆ شەڕکردن لەدژی داعش لەگەڵ هێزە ئەمنییەکانی عێراق لەدژی داعش دەربڕیوە. دوای ریفراندۆم ئوپەراسیۆنی حەویجە ئەنجام درا و بینیمان هیچ کاریگەرییکەی خراپی ریفراندۆم لەسەر ئەم شەڕە نەبووە.

مەسروور بارزانی: ئێمە لەم راگەیێنراوەش زۆر نائومێد بووین چونکە ئەمە دەربڕینی ویست و خواستی نەتەوەیەکە لەسەر ئەوەی چۆن دەیانەوێت بژین. ئێمە پێمانوایە شتێکی راست نییە کە هیچ جۆرە سیستەم یان میکانیزمێک بەسەر خەڵکانێکدا بسەپێنرێت کە لەراستیدا تەنانەت رێزی لێ نەگیراوە. ئێمە دەستوورێکمان هەبوو. ئێمە ویستمان ببین بە بەشیک لەم حکوومەتە. ئێمە ویستمان ببین بە بەشێک لەم وڵاتە بەڵام بەداخەوە ئەم حکوومەتە و حکوومەتی پیشوو ئەم دستوورەیان جێبەجێ نەکرد.

مەسروور بارزانی: ئێمە بەلایەنی کەمەوە پێشبینی ئەوەمان دەکرد کە پشتیوانی لە گفتوگۆیەکی ئاشتیانە بکەن لە نیوان ئێمە و بەغدا لە پێش و پاش ریفراندۆمیش. ئەوە حکوومەتی عێراق و سەرۆک وەزیرانی عێراق  بوو کە وتی ئێمە نە  ئێستا و نە لە داھاتوودا ریفراندۆم  قبووڵ ناکەین. ئەمە ھیچ بژاردەیەکی لەبەردەم ئێمەدا نەھێشتەوە، تەنیا ئەوە نەبێت بگەڕێنەوە بۆ خەڵکی خۆمان و بزانین خەڵکی چییان دەوێت.  بەڵێ ئێمە بێ ئومێد بووین لە ھەڵوێستی کۆمەڵگەی نێودەوڵەتی و ئەمریکا کە دژی ریفراندۆمن. بەڵام ئەوەی کە ئێمە پێشبنیمان نەدەکرد، دژایەتی کردنی ریفراندۆم بوو. ئەوان ئەگەر نەیاندەویست پاڵپشتی ریفراندۆم بکەن، خۆ دەیانتوانی ھەڵوێستێکی دوولایەنە و میانگیریان ھەبێت و بەلایەنی کەمەوە ھانی ھەولێر و بەغدا بدەن لەسەر مێزی گفتوگۆ کێشەکان بە ئاشتیانە چارەسەر بکەن. ئەمە ھیشتا رووینەداوە. لە راستیدا ئەم دژایەتیەی ئەوان ھانی بەغدایدا کە ھەندێک ھەنگاومان لەدژ بگرێتەوەبەر و گەشتە وڵاتانی دراوسێش گەمارۆمان بخەسەر و سزای خەڵکی کوردستان بدەن.

مەسروور بارزانی: ئێمە قەت نەمانوتووە پێویستە ئەمریکا لەنێوان ئێمە و بەغدا یەکێک ھەڵبژێرێت. ئێمە وتومانە ئەوان دەتوانن پەیوەندییان لەگەڵ بەغدا بھێڵنەوە ئەگەر بتوانن و ئێمەش ھاورێیان بین. ئێمە ھێشتا باوەرمان وایە کە ھاورێی زۆر نزیکی ئەمریکاین و زۆر پێزانینمان ھەیە بۆ رۆڵ و پاڵپشتی ئەمریکا و ھاوپەیمانی نێودەوڵەتیش لە ھاوکارییەکانیان لە شەری دژ بە داعش. ئێمە پێمانوانیە کە ئەم ریفراندۆمە ببێتە پاساوێک بۆئەوەی ئەمریکا و کۆمەڵگەی نێودەوڵەتیش دژی ئێمە بوەستنەوە. ئێمە ھێشتا باوەڕمان وایە کە ئەوان دەتوانن رۆڵێکی بنیادنەر بگێرن لە پاڵپشتی ھەولێر و بەغدا بۆ دەستپێکردنی دیالۆگێکی بنیادنەرانە. وەک لەوەی کە خۆیان بەدوور بگرن و دەرفەت بدەن گرژی دروست بێت، کە ھیچ کەسێک لێی سودمەند نابێت. لەبارەی رێگریکردن لە شەڕ و وێرانکاری و ناسەقامگیری، پێمانوایە ئێستا کاتی ئەوەی کۆمەڵگەی نێودەوڵەتی و پیش ھەموویان ئەمریکا کە رۆڵیان ھەبێت و ھانی ھەولێر و بەغدا بدەن گفتوگۆ بکەن وەک لەوەی کە گرژی دوست بکەن، وەک ئەوەی کە بەغدا ئێستا دەیکات.

مەسروور بارزانی: بەڵێ ئێمە بەتەواوی لەگەڵ ئەوەداین کە ھەڵبژاردن لە کاتی دیاریکراوی خۆیدا بەرێوبچێت.

مەسروور بارزانی: من پێموانیە ئەمە بابەتێکی شەخسی بێت، چونکە پێموایە سەرۆک ئەو شتەی ئەنجامداوە کە خەڵکی ویستویەتی. سەرۆک بژاردەکەی بۆ خەڵکی بەجێھێشت. کەواتە ئەمە ھەڵبژاردەی گەلی کوردە نەوەکو تەنھا کەسێک. 93% خەڵکی لەم ریفراندۆمەدا بە بەڵێ دەنگیان بۆ سەربەخۆییدا. بۆیە ئەمە ھەڵبژاردەی خەڵک بووە نەک تەنھا بژاردەی سەرۆک. 

 مەسروور بارزانی: راستە ئێمە لە ناوچەیەکدا دەژین کە بەداخەوە لە هەموو لایەکەوە تەوقکراوە . بەڵام ئەوە مانای ئەوە نییە کە خەڵکی ئێمە نابێت بە ئازادانە چارەنووسی ژیانی خۆی لە داهاتوودا دەستنیشان بکات . ئیمە لەوباوەڕەدا نین کە ریفراندۆم و ئەنجامەکانی بۆ ئەوەیە تەحەددای وڵاتانی دەرەوبەر یان عێراق بکەین . ئێمە وا تەماشای ریفراندۆم دەکەین کە چارەسەرێکە بێت بۆ کێشەکان لەگەڵ بەغدا . پێمانوایە پەیوەندی دۆستانەمان لەگەڵ بەغدا و وڵاتانی دەوروبەر لە خزمەتی هەموو ناوچەکەدا دەبێت . بۆیە ئەوە ناتێگەیشتنی ئەوانە کە ئێمە وەکو هاوبەش ویەکسان قبوڵ ناکەن کە ئەمەش بووەتە هۆی دروستبوونی ئەو گرژییە کە ئەمەش گوناهی ئێمە نییە. ئێمە داوای چارەسەرێکی ئاشتییانە دەکەین لەگەڵ بەغدا بەڵام بەغدا ئامادەنیە گفتۆمان لەگەڵ بکات وهەڕەشە دەکات کە دەستبەسەر کوردستاندا بگرێت . ئەمەش نیشانەی ئەوەیە کە ئەوان ئامادەنین ئێمە قبول بکەن وەک هاوبەش و نایانەوێت سەقامگیری لە ناوچەکە بێتە کایەوە .بۆیە با راشکاو بم ئێمە هیچ نیازێکی دوژمنکارانەمان نییەو  نامانەوێت سەقامگیریی لە رۆژهەڵاتی ناوەڕاست تێکبدەین. پێموانوایە لە رێگەی قبوڵکردنی ئێمە و گفتوگۆی دوولایەنە و گەیشتن بە چارەسەرێک کە لە قازانجی هەموولایەکدا تاک هۆکاری بەرەوپێشچوونە و ئەمەش خواستی ئێمەیە.

مەسروور بارزانی: سوپاس

- كوردستان24 دیمانه‌كه‌ی كردووه‌ به‌ كوردی