گواردیۆلا ئامانجی داهاتووی پاریس سان جێرمانە
یانەی پاریس سان جێرمانی فڕەنسی هەوڵ دەدات بۆ وەرزی داهاتوو پێپ گواردیۆلای راهێنەری ئێستای یانەی مانچستەر سیتی ئینگلیزی بكات بە راهێنەری تیپەكەی.
رۆژنامەی (دەیلی میرۆر)ی ئینگلیزی بڵاوی كردەوە: سەرۆكایەتی یانەی پاریس سان جێرمان بڕیاریداوە بۆ وەرزی داهاتوو هەوڵی گرێبەستكردن لەگەڵ گواردیۆلا بدات.
سەرۆكایەتی یانەكە دەیەوێ بۆ وەرزی داهاتوو بەهاوكاری گواردیۆلا بەهێزترین تیپ لەسەر ئاستی ئەوروپا و جیهان دروست بكات دوای ئەوەی هاوینی رابردوو گرێبەستی لەگەڵ دوو لە باشترین یاریزانی جیهان ئیمزا كردبوو كە ئەوانیش برێتی بوون لە نیمار دا سیلڤا و كیلیان مباپێ.
یانەی پاریس سان جێرمان بڕیاریداوە ئەگەر ئەمساڵ ئۆنای ئێمری راهێنەری ئیسپانی نەتوانێ ناسناوی خولی پاڵەوانانی ئەوروپا بەدەست بێنێ، ئەوا بۆ وەرزی داهاتوو لە پۆستەكەی دووری بخاتەوە و لە شوێنی ئەویش گواردیۆلا دابمەزرێنێ.
جێی باسە گواردیۆلا لە دووەم وەرزی راهێنەرایەتی یانەی مانچستەر سیتی، تا ئێستا جوانترین ئاستی پێشكەش كردووە و یانەكەی بە كۆكردنەوەی 62 خاڵ لە ریزبەندی یەكەمی یانەكانی خولی نایابی ئینگلیزییە و بە 12 خاڵ لە پێشەوەی یانەی مانچستەر یونایتدە كە ركابەری سەرسەختییەتی.
وشە -
ئامانج ئه‌كره‌م