گۆمێز لە یانەی بەرشەلۆنە مەعاناتێكی زۆری هەیە


ئەندرێ گۆمێزی یاریزانی پورتوگالی و یانەی بەرشەلۆنەی ئیسپانی ئاشكرای كرد، معاناتێكی زۆری لە یانەكەیدا هەیە تا ئەو رادەیەی بیری لەوە كردووەتەوە خۆی لە ماڵەوە گۆشەگیر بكات و چاوی بەهیچ كەسێك نەكەوێ.

گۆمێز لە هاوینی 2016 لە یانەی ڤالێنسیای ئیسپانییەوە پەیوەندی بە یانەی بەرشەلۆنە كرد، بەڵام تا ئێستا نەیتوانیوە ئاستێكی شایستە لەگەڵ یانەكەی پێشكەش بكات و ئەمە بووەتە هۆی ئەوەی بەردەوام رووبەڕووی رەخنەی هاندەران ببێتەوە و لەچەندان بۆنە و یاریشدا فیكەی ناڕەزایی بۆ لێ بدرێ.

گۆمێز لە چاوپێكەوتنێكدا لەگەڵ كۆواری (بانینكا) رایگەیاند: ئێستا وای لێهاتووە بەر دوو یان رۆژێك لە ئەنجامدانی یارییەكان دڵەڕاوكێ بمگرێ و هەمیشە بیر لە رەخنە و فیكەی ناڕەزاییەكانی هاندەران بكەمەوە، بەڵام لە كاتی مەشق و راهێنانەكاندا لەگەڵ هاوڕێكانم كەمێك باشترم.

زیاتر گوتی: هەمیشە بیر لە شتی خراپ دەكەمەوە و لە تەنگژەدام، ئەمە سەرەڕای ئەوەی سەرجەم هاوڕێكانم لە یانەی بەرشەلۆنە پشتگیریم دەكەن و هاوكار و پاڵپشتمن.

گۆمێز هەروەها رایگەیاند: هەمیشە ئارەزووی ئەوە دەكەم لە ماڵەوە خۆم گۆشەگیر و حەپس بكەم و چاوم بە هیچ كەسێك نەكەوێ، هەروەها نامەوێ قسە لەگەڵ هیچ یاریزان و هاوڕێیەكیشم بكەم، چونكە خۆم بە شەرمەزار دەزانم.

لە كۆتاییدا ئەو یاریزانەی هەڵبژاردەی پورتوگال رایگەیاند: وام لێهاتووە لە چوونە دەرەوە و گەڕان لەنێو شەقامەكانی بەرشەلۆنە بترسم و نامەوێ چاوم بە هیچ كەسێك بكەوێ، بەڕاستی ئەوەی زیاتر بێزارم دەكات ئەوەیە كە دەڵێن دەتوانێ باشتر یاری بكەیت، خۆشم پرسیار لەخۆم دەكەم بۆچی ناتوانم ئەمە بكەم.




وشە - ئامانج ئه‌كره‌م


AM:09:50:13/03/2018




ئه‌م بابه‌ته 108 جار خوێنراوه‌ته‌وه‌‌