ئێسكە پەیكەری دایناسۆرێك دۆزرایەوە


لە چەند رۆژی رابردوودا لە ئەرجەنتین شوێنەواری دایناسۆرێكی گەورە دۆزرایەوە كە پێشبینی دەكرێت ئەوكات كێشی دایناسۆرەكە نۆ تۆن بووبێت. دایناسۆرەكە دەگەڕێتەوە قۆناغی تریاسیكی زەویناسی.

ئەوەی سەرنجی لێكۆڵەرەوان و توێژەرانی بۆ لای خۆی راكێشاوە ئەوەیە پێشتر لە هەمان قۆناغ ئێسكە پەیكەری دایناسۆر دۆزراوەتەوە، بەڵام هیچ كام لەو دۆزینەوانە تا ئەو ئاستە گەورە نەبوون و دەگوترێت ئەمەیان سێ هێندەی نموونەكانی پێشترە، بۆیە ناوی یەكەم زەبەلاحیان لە دایناسۆرەكە ناوە.

بەگوێرەی "مێهرنیوز" قۆناغی تریاسیك بریتییە لە 200 تا 251 ملیۆن ساڵ لەمەوبەر. جیاوازی لە نێوان دایناسۆرەكاندا هەبووە و ئەوانەی رووەكخۆر بوون جەستەیان لە جۆرەكانی تری دایناسۆر گەورەتر بووە و هەر بە هۆی گەورەیی لەشیشیان لە بەرانبەر ئاژەڵەكانی تر بەرگرییان لە خۆیان كردووە.

زانایان دەڵێن دایناسۆرەكان سەرووی 160 ملیۆن ساڵ لەسەر زەوی ژیاون و تا 65 ملیۆن ساڵ لەمەوبەر هەر لەسەر زەوی ماون و دواتر سەرجەمیان لەناو چوون.

مرۆڤ دوای دۆزینەوەی ئێسكەپەیكەری دایناسۆر ویستوویەتی زیاتر لە رابردووی زەوی بزانێت و لەسەر بنەمای  زانست و تیۆر و گریمانەكانیش دەیان فیلم بەرهەم هاتوون.





وشە - سلێمان تاشان


PM:02:49:11/07/2018




ئه‌م بابه‌ته 184 جار خوێنراوه‌ته‌وه‌‌