کچە رەشپێستێک بوو بە شاجوانی بەریتانیا

بۆ یەکەمجار لە مێژووی بەریتانیا خاتوونێکی رەشپێست بوو بە شاجوانی یەکەمی بەریتانیا و بڕیارە کۆتایی ئەمساڵ وەک نوێنەری بەریتانیا لە کێبرکێی شاجوانی جیهاندا بەشداری بکات.

ئەمڕۆ چوارشەم 18ی تەمووز/یۆلیۆ، ئاژانسی هەواڵی بی بی سی رای گەیاند، دی ئان کەنتیش، خانمە ڕەشپێستی بەریتانی لە 66ەمین کێبڕکێی هەڵبژاردنی شاجوانی بەریتانیا توانی بەسەر سەرجەم رکابەرەکانیدا سەرکەوێت و پلەی یەکەم بەدەست بهێنێت.

کێبڕکێ بۆ دیاریکردنی شاجوانی بەریتانیا 66 ساڵ لەمەوبەر بەبێ بڕانەوە بەڕێوەچووە و ئەوە جاری یەکەمە خانمێکی رەشپێست بتوانێت تیایدا پلەی یەکەم بەدەست بهێنێت.

دی ئان 25 ساڵانە و لەدایکبووی ئانگۆلا، یەک لە دوورگەکانی کاراییبە کە لەژێر حوکمڕانی بەریتانیادایە و وەک لە چاوپێکەوتنێکدا لەگەڵ گۆڤاری نیوزبیت رای گەیاندووە، ئەو سەرکەوتنەی وەک باشترین ئەزمونی ژیانی دەبینێت.

زیاتر دەڵێ، لەگەڵ نزیکبوونەوە کێبرکێکە هەستم دڵنیایی ئەوەی پێ بەخشیم سەرکەوتن بەدەست دەهێنم، بۆیە من ئەو تاجەی وەک شاجوان پێم بەخشرا، نەک وەک ژنێکی رەشپێست، بەڵکو بۆ سەرجەم هاوڵێ‌تیانی بەریتانیم دەیکەمە سەرم.

ئەو خانمە شۆخوشەنگە سەرەتا ویستوویەتی ببێت بە وەرزشکارێکی سەرکەوتوو، تەنانەت لە چەند کێبڕکێیەکی نێودەوڵەتیدا بۆ راکردنی مەیدا بەشداری کردووە، بەڵام لەکاتی کێبڕکێدا ئەژنۆی دەپێکرێت و بۆ هەتا هەتایە ماڵاوایی لەو خەونەی دەکات.

ئان دەڵێ، ئێستە لە رێگەیەکی ترەوە هەوڵمداوە خەونەکەم بۆ سەرکەوتن بهێنمە دی، هەڵبژاردنم وەک شاجوانی یەکەمی بەریتانیا بە سەرکەوتنم لە کێبرکێی راکردنی مەیدان دەشوبهێنم و جیاوازییان پێ ناکەم، بەڵام خۆ ئامادەکردن بۆ کێبرکێی شاجوانی بەریتانیا زۆر قورسترە لە ئامادەبوون بۆ بەسداریکردن لە راکردن و مەیدان.