ماوەی دوو رۆژە قایمقامیەتی كەلار ژمارەیەك بڕیاریان لەبارەی كاری پیشەوەر و دەستگێڕەكانی ناو بازاڕ دەركردوە و نیگەرانی پیشەوەرانی لێ كەوتۆتەوە و سەندیكای كرێگارانیش نیگەرانە پرس و رایان پێ ناكرێ لەبارەی كاری پیشەوەر و كرێكارانەوە.
ئەمڕۆ سێشەم 21ی ئایار، هیوا محەمەد وەك دەستگێرێك بۆ "وشە" ئاماژەی بۆئەوە كرد، قەدەغەكردنی هاتووچۆی ئۆتۆمبیل و ماتۆرسكیل بە شەوان بۆ ناو بازار بۆتە هۆی نەمانی بازاڕیان
عومەر محەمەد، بەرپرسی لقی گەرمیانی سەندیكای كرێكاران و پیشەوەرانی كوردستات بۆ "وشە" رای گەیاند، ئەو رێوشوێن و بڕیارانە بە بێ ئاگاداری سەندیكای كرێكاران و پیشەوەران دەركراوە، ئەوەش نیگەرانی كردوین.
زیاتر روونی دەکاتەوە، لەرووی یاساییەوە ئێمە لایەنی پێوەندیداری تایبەت بە پیشەوەر و كرێكارانین و دەبێ پرس و رمان پێ بكرێ و ئەگەر هیچ كەسێك سكالاچی نەكردوە بۆچی بڕیاری لەوجۆرە بەسەر پیشەوەران و كاسبكاراندا جێبەجێ بكرێ.
ڕۆژییەکشەم 19ی ئایار، قایمقامی كەلار لەگەڵ شارەوانی و لایەنە تەناهییەکان لە ئاسایش، پۆلیس و پۆلیسی هاتووچۆ كۆبووەوە و چەند بڕیارێك درا و پاشتر خرانەبواری جێبەجێكردنەوە كە بریتی بوون لەم بڕیارانە
1- قەدەغەكردنی هاتووچۆی ئۆتۆمبێل و ماتۆرسكیل بۆ ناوبازاڕ لە شەوان دا
2- عارەبانە و چایخانەكان یەك مەتر بواریان پێدەدرێت لە شۆستەكەوە بێنە سەر شەقامی سەرەكی.
3- ڕێژەی ئەندامانی لیژنەی ئەمنی لە ئاسایش و پۆلیس و پۆلیسی هاتووچۆ لە نێو بازار زیاتر دەكرێت.
گەرمیان/ سەبری هۆرێنی