هەریەك لە بەڕێوەبەری پۆلیسی هاتوچۆی پشدەر و بەڕێوەبەری بنكەی هاتوچۆی قەڵادزێ بەهۆی مامەڵەی نەشیاوەوە وازیان لە یەكێتی نیشتمانی كوردستان و پۆستە ئیدارییەكەیان هێنا.
رائید هانا نووری عەزیز بەڕێوەبەری پۆلیسی هاتوچۆی پشدەر لە لاپەڕەی فەرمی خۆی لە تۆڕی كۆمەڵایەتی فەیسبووك وێنەی نووسراوێكی فەرمی بڵاوكردەوە كە واژووی خۆی و رائید ساڵح عەبدوڵا، بەڕێوەبەری بنكەی هاتوچۆی قەڵادزێی بەسەرەوەیە تیایدا ئاماژە بە ئەوە دراوە كە وازیان لە یەكێتی و پۆستە ئیداری و حزبییەكانیان هێناوە.
لەو نووسراوەدا كە بۆ مەڵبەی 24ی یەكێتی لە راپەرین نێردراوە هاتووە: "بەهۆی مامەڵەی ناتەندروستی هەریەك لە "ساڵحی شەهیدان" ئێمە گەیشتینە ئەو ڕایەی كە واز لە یەكێتیی نیشتمانی كردستان بهێنین و دەستبەرداری سەرجەم ئەو پۆستە ئیداری و حزبییانە بین، لەو ساتەوە ئێمە ئازادین چۆن بیر دەكەینەوە".
"وشە" چەند جارێك پێوەندی بە رائید هانا نووری، بەڕێوەبەری بەشی هاتوچۆی پشدەرەوە كرد، بەڵام وەڵامی پێوەندییەكەی نەدایەوە و دواتر ژمارەكەی داخست.
سلێمانی/ هەستیار عەبدوڵا