سەباح پیرباڵ برای دكتۆر فەرهاد پیرباڵ نووسەر و مامۆستای زانكۆی ناودار، لەسەر ڕووداوی سووتانی كتێبخانەی ماڵی وەفایی ڕوونكردنەوەیەكی سەبارەت بە دۆخی براكەی بڵاو دەكاتەوە و دەڵێ، دوای سەردانەكەی بۆ ئێران گۆڕاوە.
بەرەبەیانی ڕۆژی 15ی تەمووز، فەرهاد پیرباڵ هێرش دەكاتە سەر ماڵی وەفایی و دەیسووتێنێ و لە تۆڕی كۆمەڵایەتیی فەیسبووك بە ڕاستەخۆ بڵاوی دەكاتەوە و دواتر پۆستێكی لەسەر دەكات كە ئەوە لە ئەنجامی كێشەی ئەو و خاوەنی كتێبخانەكە بووە، چونكە بەبێ مۆڵەت كێتبی بۆ چاپ كردووە.
سۆران عەزیز خاوەنی كتێبخانەی ماڵی وەفایی ڕۆژی ڕووداوەكە بە "وشە"ی گوت، هەموو بەڵگەیەكی پێویستی لایە و چەندان شایەتحاڵیش ئاگەدارن كە كتێبەكان لەلایەن نووسەر خۆیەوە داوای لێ كراوە تا چاپی بكات.
ئەمڕۆ چوارشەم (17ی تەمووز) سەباح پیرباڵ برای دكتۆر فەرهاد لە هەژماری خۆی لە تۆڕی كۆمەڵایەتیی فەیسبووك نووسیویەتی: ئەوەی تێبینی دەكرێت، لەو ماوەیەدا بەهۆی برادەرێكی ئێرانی، سەردانی ئێران دەكات، دوای ئەوە فەرهاد گۆڕا بە فەرهادێكی تر كە ئالوودە بووبوو. بە هۆی برادەرە ئێرانییەكەی، هەرچی پارەوپوولی هەبوو، هەمووی لەسەر دانا و چەندی تریش كە لەلایەن كەسایەتیی حكوومی و حیزبییەوە هاوكاری دەكرا بەشی ئەوەی نەدەكرد.
لە بەشێكی تردا دەڵێ، فەرهاد لەدەست دەرچوو بوو، ئاگاداری حكوومەت و دەسەڵاتمان كردەوە كە كێشە دەروونییەكانی چارەسەر بكەن تا، كار گەیشتە ئەوەی لە زستانێكی قورسدا لەگەڵ زیادی برام و دكتۆرێك ڕەوانەی ئەڵمانیا كرا، بەڵام لەوێ دكتۆرەكان سەریان لێ سوڕما، لە عەبقەرییەتی فەرهاد و نەیانتوانی بیخەنە بەر چارەسەر و سیستمی چارەسەری ئەو وڵاتە وایە كە نەخۆش دەبێ داوا بكات بۆ چارەسەر لەبەر ئەوە گەڕایەوە، بەبێ وەرگرتنی چارەسەر، بەڵام پزیشكەكان پێیان گوتین كە لەماوەی سێ ساڵدا بە تەواوی تێ دەچێ.
ئەم گوتانەی سەباح پیرباڵ، بەشێك بوون لە بانگەوازێكی درێژ كە ئەمەی خوارەوە دەقەكەیەتی:
فەرهاد ئەو كەڵەپیاوە رۆشنبیرەی بوو بە قووربانیی كتێب و وشە
كەم كەس هەیە بتوانێ كارەكانی فەرهاد هەڵبسەنگینێ، هەر لەو كاتەی كە وڵاتی فڕەنسای جێهیشت و بە كاروانێك كتێب و دۆكیۆمینتی دانسقە گەڕایەوە بۆ كوردستان و دانانی بەردی بناغەی یەكەمین گۆڤاری بوێر، زنجیرەی گۆڤاری "وێران" و پاشان یەكەمین شوێنی رۆشنبیری هاوچەرخ شەرفخان و پاشان زنجیرە گۆڤاری وەرگێڕ و پاشان چەندان لێكوڵینەوە و نووسین لە بواری میژوو و ئەدەب و دەیان كتێبی جۆراوجۆر كە تا ئیستە زیاتر لە 80 كتێب دەبێت، سەرەڕای چەندان بیرۆكەی جیاجیا لە بواری پەرەپێدانی مێژوو و هونەری كوردی كە بۆی نەكراوە ئەنجامی بدات، سەرەڕای هەڵویستی لە بارەی راگرتنی شەڕی براكوژی و ڕاوەستانی لەسەر سنووری نیوان توركیا و كوردستان.
من وەك خۆم زیاتر ناڵێم چەندان كاری تریش كە ئێوەش دەیزانن. فەرهاد لەناو رۆشنبیراندا زۆر بە كەمی هاوڕێی هەبوو، تەنیا هاوڕێی بەردەوامی ئەو پیاوە، كتێب بوو، تەنیا كتێب و وشە، هەرگیز چاوی لە پۆست و پایە نەبووە، زۆریش سادە و ساكار بووە، هەم لە وەزیفە و هەمیش لە ژیانی ڕۆژانەی خۆیدا، بەجۆریك قوتابی وەك هاوڕێی خۆی سەیری كردوون. كەواتە تەنیا كتێب.
لەو رۆژانەی فەرهاد چاوی كامێراكان و رۆژنامەنووسان دەبوو سەرە بگرن بۆ ئەوەی چاوپێكەوتنی لەگەڵدا بكەن، لە وەڵامی یەكێك لە رۆژنامەنووسەكان لەبارەی سوود و زیانی كتێب، فەرهاد گوتی: كتێب زیانی هەیە، خویندنەوەی كتێب زۆرجار دەبیتە هۆی یاخیبوون و شیتبوون، وات لێ دەكات بەگژ زۆر شتدا بچیتەوە، تەنانەت بۆ باوك و برا و كەسانی خوشەویست و هەندێك جار بێغەمبەر و خواش.
فەرهاد لەماوەی ژیانیدا، بەم جۆرە لەناو وشە و كتێب ژیاوە، جا ئەوەی گوتی بەسەر خۆیدا هات، ئەمەش لەپێناو خزمەتی وشە و میژووی كوردیدا بەر لە تێكچوونی باری دەروونیی فەرهاد، هیچ كاتێك ئالوودەی مەشرووب نەبووە، تەنیا یەك قۆدی بیرەش بەخۆی رەوا نەبینیوە و زیاتر نا.
خوالێخۆشبوو مەلا حەسەنی حیزبی شیوعی لە موناسەبەیەك پێی گوت: فەرهاد هەوڵ بدە موڵكی خۆت بی، نەبیتە موڵكی هیچ حزبێك، ئەگەر منیش پێم گوتی ببە بە شیوعی، بە دەنگیكی بەرز بڵی "نا". فەرهاد وا بوو. لەسەدا نەوەتی خەڵك و رۆشنبیر و گەنجان، پشتگیریان لێ دەكرد، تا 2009 هەندێك وایان دەزانی فەرهاد لایەنگیری بۆ حزبێك دەكات، ئەوەبوو لە كەلار كتێبەكانی فەرهادیان سووتاند و لە سلێمانیش تووشی كێشە و لێدان هات، لە زانكۆش بەربەرەكانیان دەكرد، سەرەڕای ئەمەش، هۆكاری لێكجیابوونەوەی لەگەڵ خێزانەكەی ئەمانە هەمووی وای لە فەرهاد كرد كە حاڵەتێك بەسەری هاتووە، هەرگیز بیری لێ نەدەكردەوە و بەم جۆرە كاردانەوانە ئاشنا نەبوو.
ئەوەی تێبینی دەكرێت، لەو ماوەیەدا بەهۆی برادەرێكی ئێرانی، سەردانی ئێران دەكات، دوای ئەوە فەرهاد گۆڕا بە فەرهادێكی تر كە ئالوودە بووبوو. بە هۆی برادەرە ئێرانییەكەی، هەرچی پارەوپوولی هەبوو، هەمووی لەسەر دانا و چەندی تریش كە لەلایەن كەسایەتیی حكوومی و حزبییەوە هاوكاری دەكرا بەشی ئەوەی نەدەكرد.
لەكاتی خۆشیدا، شەش ساڵ بەر لە ئێستە، لە كاتێكدا كە فەرهاد لەپشت مزگەوتی سەواف و بەرانبەر بنكەی پۆلیس خۆپیشاندانی دەكرد، كەناڵی رووداو لەوێ بوو، بەباشم زانی پەیامی خۆم بگەیەنمە لایەنی حكوومی و لە رووداوەوە ئاگاداری حكوومەتم كرد كە چارەسەرێك بۆ فەرهاد بدۆزنەوە و ڕزگاری بكەن، بەڵام نازانم پەیامەكەم گەیشت یان نا، دڵنیام نەگەیشتووە.
سەرتان نەهێشینم فەرهاد بەو دەردە چوو كە خۆی دەیزانی وای لێ دێت و پاڵنەریش هەبوو كە هاوكار بێت لەسەری. فەرهاد كەسێك نەبوو ئێمە ئامۆژگاری بكەین، لەدەست دەرچوو بوو، تا ڕووداوەكانی مونا قەهوەچی دوای ئەوە زۆرجار دیسان ئاگاداری حكوومەت و دەسەڵاتمان كردەوە كە كێشە دەروونییەكانی چارەسەر بكەن تا، كار گەیشتە ئەوەی لە زستانێكی قورسدا لەگەڵ زیادی برام و دكتۆرێك ڕەوانەی ئەڵمانیا كرا، بەڵام لەوێ دكتۆرەكان سەریان لێ سوڕما، لە عەبقەرییەتی فەرهاد و نەیانتوانی بیخەنە بەر چارەسەر و سیستمی چارەسەری ئەو وڵاتە وایە كە نەخۆش دەبێ داوا بكات بۆ چارەسەر لەبەر ئەوە گەڕایەوە، بەبێ وەرگرتنی چارەسەر.
فەرهاد بەردەوام بوو لە هەڵویستە كانی چونكە نەكەوتە ژیر چارەسەر و بەقسەی دكتۆرە پسپۆڕەكانیش ئەگەر چارەسەر وەرنەگریت لەماوەی سێ ساڵدا بە تەواوی مێشكی تێك دەچێت، وەك ئیستە كە وای لێ هاتووە، و دوای ئەوەی فەرهاد بەردەوام بوو لە كارە سەیرەكانی، ناچار بووین كە داوا لە حكوومەت بكەین لەبەر ئەوەی لەژیر كۆنترۆڵی خۆی و ئێمەشدا دەرچووە، داوامان كرد دەستگیر بكرێت بۆ ئەوەی لە شوێنێكی تایبەت دوور بخرێتەوە لە جەنجاڵیی شار و دووریش بخرێتەوە لە برادەرانی ئێرانی و بكەویتە ژیر چارەسەری دەروونی و پزیشكی، بۆ ئەوەی بێتەوە سەر خۆی، بەڵام زۆر بەداخەوە حكوومەت لە سنجی محەتە لە ژوورێك گوایە تەنیایە دانرا، ئەو سجنەی كە پڕ بوو لە پیاوكوژ و دز و تاوانباری جۆراوجۆر، ئەمەش وای لە فەرهاد كرد خراپتر بێت لە جاران. ناچار بووین ساڵی پار دیسان هەوڵ بدەین بە هاوكاریی حكوومەت لە وڵاتی ئوردن نەخۆشخانەیەك بدۆزینەوە كە تایبەت بوو بە چارەسەری دەروونی و ئالوودەبوون، بەپیی راپۆرتی پزیشكی كە ناردبوومان بۆ نەخۆشخانەكە داوایان كرد بە زووترین كات دەبێ ئەم نەخۆشە بگاتە بەردەستیان و بە ماوەی سێ مانگ چارەسەری دەكەن و پارەكەشی لەلایەن حكوومەتەوە تەرخان كرابوو بە چوار دەفتەر دۆلار، لەبەر ئەوە ئاگاداری فەرهادمان كردەوە كە شتێكی وا لەئارادا هەیە و بۆ ئەو مەبەستەش هەموو شتێك ئامادە كرابوو. لە ڤیزای چوار كەسی و هەموو پێداویستییەكان .
ئیمە پێمان باش بوو كە بە تەنسیق لەگەڵ پۆلیسی هەرێم و كاربەدەستانی فڕۆكەخانە و كارمەندانی پزیشكی لە وڵاتی ئوردن گواستنەوەكەی بكرێت، بەڵام فەرهاد یەكەم جار ڕازی نەبوو، پاشان گوتی دەچم بەڵام بەمەرجێك هەفتەیەك خۆم ئامادە دەكەم پاشان. ئێمەش رازی بووین.
بۆ ئەوەی فەرهاد لە سجنی محەتە كە شوێنێكی نەگونجاو بوو ڕزگاری بكەین، داوامان كرد كە ئازاد بكرێت و پاشان بیبەین بۆ نەخۆشخانەی ئوردن.
كاك عەبدولخالقی بەڕێوەبەری پۆلیس، بڕیاری دا بە شێوازێكی شایستە فەرهاد بهێنرێتە بەڕێوەبەرایەتیی پۆلیس و ئێمە وەری بگرین، بەڵام ئێمە داوامان كرد دوور بێت لە چاوی كامێرا. فەرهادیان هێنا و لە ژووری كاك عەبدولخالق لەگەڵ هەمووان یەكترمان ماچ كرد و دڵخۆش بووین بەوەی كە فەرهاد ئازاد كرا و دوای حەوانەی هەفتەكە فەرهاد بچێت بۆ نەخۆشخانەی ئوردن.
جارێ هەر لەوێ دوای ئاوخواردنەوە، هێرشی كردە سەر كاك عەبدولخالق و دادگە، ئێمە خەجاڵەت بووین، چونكە حاڵەتەكەی لەوە دەچوو كە فەرهاد نیازی نییە چارەسەر وەربگریت و هەر لە ئێستەوە لەژێر كۆنترۆڵ دەردەچێت لەبەر ئەوە داوامان كرد بەو شێوەیە ئازاد بكرێت. ئەگەر فەرهاد دەستدرێژی و تەجاوزی كردە سەر هەریەكێك یان هەر دەزگەیەكی ئەهلی و حكوومی، ئێمە ناتوانین كۆنترۆڵی بكەین، ئەوا حكوومەت ئازادە لە بەدواداچوون و بەپێی یاسا مامەڵەی لەگەڵدا بكرێت.
فەرهادمان وەرگرت و هێنامەوە ماڵی خۆم، دوای ئەوەی بە هەموو خێزانەكەمانەوە خوانێكمان خوارد، دوای تەواوبوونی خوانەكە فەرهاد لەماڵ دەرچوو، ئیستەیش فەرهادم نەبینی بێتە ژێر چارەسەرەكە، تەنیا لە شاشەی تیڤی و تۆڕە كۆمەڵایەتییەكان كە لەو كاتانەدا لە خوێنی خۆم لە هەناومدا مەلە دەكەم.
ئەوەی باسم كرد، كورتەیەكە. من ناڵێم كردارەكانی فەرهاد سروشتییە، بەڵی ناسروشتین، زۆریش كە لە بابەتەكە ناگەن، قسەو ڕای جیاواز دەكەن. هەیە دەڵێ شێتە و تێی هەڵدەن و بیكوژن، هەیە دەستخۆشی لێ دەكات و پشتیوانیی دەكات.
داواكارم لە ڕۆشنبیران، نووسەران، گەنجان، خەڵكی شار و لادێكان بكەونە هەوڵدان بۆ پێكهینانی كەمپینێك و فشار بخەنە سەر حكوومەت كە هەر حكوومەت دەتوانێ ئەو مەسەلەیە چارەسەر بكات.
تكایە یەكێتی نووسەران رۆشنبیران هونەرمەندان خەڵكی بەشەرەفی كوردستان دەنگتان یەكبخەن بۆ فشار خستنە سەر حكوومەت بۆ رزگاركردن و چارەسەری دەروونی و پزیشكی تەواوی دكتۆر فەرهاد پیربال. بەفیرۆچوونی ئەم كەڵە پیاوە لە ئەستۆی حكوومەتی نوێی هەرێمی كوردستانە . ئەم پیاوە نەخۆشە ئەگەر تاوانبارە بە پێی یاسا مامەڵەی لەگەڵدا بكەن ئەگەریش ماف خوراوە دوای چاكبوونەوەی مافەكانی بۆ بگەڕێننەوە . ئیمە ناڵێین چارەسەر كێشەی مادی و شوێن و كتێبخانەكانی دابین بكرێت ئەمانە هیچ مانایەكیان نییە و هەمووی بەلاوە دەنێین هەروەها ئێستە كاتی تەسفیەكردنی حیسابات و تاوانكاری نییە، بەڵكو گرنگ باری تەندروستی فەرهادە و بە زووترین كات دەبێت ئەو پڕۆژەیەی دابوومانە كاك سەفین دزەیی و حكوومەت كاری لەسەر كرد بۆ نەخۆشخانەكەی ئوردن دەبێت بخرێتە بواری جێبەجێكردن، ئەگەر دەتانەوی فەرهاد بگەڕێتەوە جاری جاران.