سەرۆک بارزانی پەیامێک بڵاو دەکاتەوە

:: PM:01:53:21/09/2019 ‌

سەرۆک بارزانی بەبۆنەی 49یەمین ساڵیادی دامەزراندنی یەکیتی زانایانی ئاینی ئیسلامیی کوردستان پەیامێکی پیرۆزبایی بڵاو دەکاتەوە و رای دەگەیەنیت، دامەزراندنی یەكێتیی زانایانی ئاینی ئیسلامیی كوردستان لەسەر دەستی جەنابی بارزانیی نەمر هەنگاوێكی كاریگەر بوو بۆ یەكخستن و پەرەپێدانی ڕۆڵی مامۆستایانی ئایینی لە شۆڕش و ژیانی سیاسی و كۆمەڵایەتیی خەڵك.

ئەمڕۆ شەموو 21ی ئەیلوول پێگەی فەرمی سەرۆک بارزانی پەیامێکی پیرۆزبایی بڵاو کردووەتەوە و تیایدا ئاماژە دراوە، بەبۆنەی چل و نۆیەمین ساڵیادی دامەزراندنی یەكێتیی زانایانی ئایینی ئیسلامیی كوردستان، پیرۆزبایی خۆم ئاراستەی سەرۆك و ئەندامانی مەكتەبی تەنفیزی و ئەنجوومەنی ناوەندی یەكێتیی زانایانی ئایینی ئیسلامیی كوردستان و مامۆستایان و هەموو گەورە زانایانی ئایینی ئیسلامیی كوردستان دەكەم.

لە بەشێکی تری پەیامەکەدا روون کراوەتەوە، دامەزراندنی یەكێتیی زانایانی ئایینی ئیسلامیی كوردستان لەسەر دەستی جەنابی بارزانیی نەمر هەنگاوێكی كاریگەر بوو بۆ یەكخستن و پەرەپێدانی ڕۆڵی مامۆستایانی ئایینی لە شۆڕش و ژیانی سیاسی و كۆمەڵایەتیی خەڵك و پتەوكردنی بنەماكانی پێكەوەژیان و خواناسی لە كوردستان. مامۆستایانی ئایینی لە هەموو قۆناغەكاندا ئەو ڕۆڵەیان زۆر بە شاییستەیی گێڕاوە و ئەرك و ماندووبوونیان جێگەی ڕێزی هەموو لایەكە.

"پێزانینم هەیە بۆ هەڵوێست و ڕۆڵی مامۆستایانی ئایینیی بەڕێزی كوردستان لە ڕووبەڕووبوونەوەی هزری توندڕۆیی و گومڕایی و هەروەها پاڵپشتیكردنی دۆزی ڕەوای گەلی كوردستان و دەستخۆشییان لێ دەكەم" لە پەیامەکەدا وا نووسراوە.

لە کۆتاییدا دووپات کراوەتەوە، لەو بۆنەیەدا هیوای سەركەوتن بۆ هەموو مامۆستا و گەورە زانایانی ئایینی ئیسلامیی كوردستان دەخوازم و خودای مەزن پشت و پەنای هەموومان بێت.



وشە - هیدایه‌ت جان

ئه‌م بابه‌ته 4825 جار خوێنراوه‌ته‌وه‌‌